Захиргаа · Хяналт шат
ХЭРГИЙН ТАНИЛЦУУЛГА: Нэхэмжлэгч нь аймгийн Иргэдийн Төлөөлөгчдийн Хурлын Тэргүүлэгчдийн нарийн бичгийн даргын албан тушаалд томилуулах, ажилгүй байсан хугацааны цалин, даатгалыг нөхөн төлүүлэх, мөн хариуцагчийн холбогдох тогтоолын заалтыг хүчингүй болгуулахыг шаардсан. Нэхэмжлэгч тус албан тушаалд нэр дэвшсэн боловч, хариуцагч нь нэг хүний нэр дэвшүүлсэн болон нэхэмжлэгчийн өмнөх ёс зүйн зөрчлийг үндэслэн томилохоос татгалзжээ. АНХАН ШАТ: Нэхэмжлэлийн бүх шаардлагыг хэрэгсэхгүй болгосон. Захиргааны ерөнхий хууль, Төрийн албаны тухай (2002 оны) хууль, Засаг захиргаа, нутаг дэвсгэрийн нэгж, түүний удирдлагын тухай хуулийн холбогдох зүйл заалтыг үндэслэсэн. ДАВЖ ЗААЛДАХ ШАТ: Нэхэмжлэгчийн гомдлыг хэсэгчлэн хангаж, анхан шатны шийдвэрийг хүчингүй болгосон. Тогтоолын заалтыг хүчингүй болгуулах шаардлагыг хүлээн авахаас татгалзаж, хэргийг хэрэгсэхгүй болгосон. Нэхэмжлэгчийг тухайн албан тушаалд томилохоос татгалзсан нь хууль бус болохыг тогтоож, томилохыг даалган, ажилгүй байсан хугацааны цалин, даатгалыг нөхөн төлүүлэхээр шийдвэрлэсэн. Төрийн албаны тухай (2002, 2017 оны) хуулиуд, Засаг захиргаа, нутаг дэвсгэрийн нэгж, түүний удирдлагын тухай хууль, Захиргааны ерөнхий хуулийн холбогдох зүйл заалтыг баримталсан. ХЯНАЛТЫН ШАТ: Хариуцагчийн гомдлыг хангаж, давж заалдах шатны магадлалыг хүчингүй болгож, анхан шатны шийдвэрт өөрчлөлт оруулсан. Нэхэмжлэгчийн томилох, цалин, даатгал нөхөн төлүүлэх шаардлагыг хэрэгсэхгүй болгож, тогтоолыг хүчингүй болгуулах шаардлагыг хүлээн авахаас татгалзаж, холбогдох хэргийг хэрэгсэхгүй болгосон. ҮНДЭСЛЭЛ: Хяналтын шатны шүүх доод шатны шүүхүүд хуулийг буруу тайлбарлаж хэрэглэсэн гэж үзсэн. 1. Төрийн албаны зөвлөлөөс нэр дэвшүүлсэн иргэнийг томилох эрх бүхий этгээд хуульд заасан үндэслэлээр нэг удаа татгалзах эрхтэй тул заавал томилох үүрэггүй. 2. ИТХТ-ийн нарийн бичгийн даргын албан тушаалд хоёроос доошгүй иргэний нэрийг дэвшүүлэх ёстой байтал нэг хүний нэр дэвшүүлсэн тул хариуцагчийн томилохоос татгалзсан нь хууль бус үйлдэл биш. Иймд давж заалдах шатны шүүхийн дүгнэлт буруу. 3. Нэхэмжлэгч гомдлоо хуульд заасан хугацаанд гаргаагүй тул нэхэмжлэлийн үндэслэлгүй. 4. Хариуцагч хууль бус үйлдэл гаргаагүй тул ажилгүй байсан хугацааны цалин, даатгал нөхөн төлүүлэх үндэслэлгүй. 5. Нэхэмжлэгчийн эрх үүсэхээс өмнө гарсан захиргааны актын эсрэг маргах эрхгүй тул холбогдох нэхэмжлэлийг хүлээн авахаас татгалзсан нь зөв.
