Тогтоол №4892

ХЭРГИЙН ТАНИЛЦУУЛГА: "Т" ХХК нь Өмнөговь аймгийн Засаг даргын Тамгын газрыг үерийн ус зайлуулах шугам сүлжээний зураг, төсөв боловсруулах ажлын тендерт шалгарсан компанитай хуулийн хугацаанд гэрээ байгуулаагүй нь хууль бус болохыг тогтоож, гэрээ байгуулахыг даалгах тухай шаардлага бүхий нэхэмжлэл гаргасан. Хариуцагч тал нь тендерийн хүчинтэй байх хугацаа дууссан тул гэрээ байгуулах боломжгүй байсан гэж тайлбарласан.

АНХАН ШАТ: Шүүх нэхэмжлэлийн шаардлагыг бүхэлд нь хангаж, Өмнөговь аймгийн Засаг даргын Тамгын газрыг тендерт шалгарсан компанитай гэрээ байгуулаагүй нь хууль бус болохыг тогтоож, гэрээ байгуулахыг даалгасан. Нэхэмжлэгчээс төлсөн улсын тэмдэгтийн хураамжийг хариуцагчаас гаргуулж олгохоор шийдвэрлэсэн.

ҮНДЭСЛЭЛ: Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 28.2-т заасныг үнэлгээний хороо зөрчиж, тендерийн үнэлгээг хүчинтэй хугацааны сүүлээр хийсэн. Мөн захиалагч нь гэрээ байгуулах эрх олгох тухай мэдэгдлээс хойш ажлын 5 хоногийн дараа гэрээ байгуулахаар заасныг зөрчиж, нэхэмжлэгчээс үл хамаарах шалтгаанаар хугацаа хэтрүүлсэн нь хууль бус үйлдэл болсон. Энэ нь нэхэмжлэгчийн эрх, ашиг сонирхлыг зөрчсөн гэж шүүх үзсэн.