Тогтоол №4638

ХЭРГИЙН ТАНИЛЦУУЛГА: Ашигт малтмалын тусгай зөвшөөрөл эзэмшигч нь орон нутгийн хамгаалалтад авах тухай захиргааны актуудыг эрх ашиг хөндөгдсөн, хууль хэрэглээний алдаатай гэж үзэн хүчингүй болгуулахаар нэхэмжилжээ. АНХАН ШАТ: Хариуцагч байгууллагын гаргасан тогтоол нь Захиргааны ерөнхий хууль, Газрын тухай хууль, Тусгай хамгаалалттай газар нутгийн тухай хууль, Ашигт малтмалын тухай хууль зэрэг холбогдох хуулиудын журмыг зөрчсөн, үндэслэлгүй, хууль бус захиргааны акт гэж үзэн нэхэмжлэлийг хангаж шийдвэрлэжээ.

ҮНДЭСЛЭЛ: Хариуцагч байгууллага нь тусгай хэрэгцээнд болон орон нутгийн хамгаалалтад газар авахдаа Газрын тухай хуулийн 20.1.3, 25.1, 25.1.5, Засгийн газрын 2003 оны 28 дугаар тогтоолын 3 дугаар хавсралтаар баталсан "Газар зохион байгуулалт хийх журам"-ын 9, 11 дүгээр зүйлийг зөрчсөн, байгаль орчны хамгаалалт, эрүүл ахуйн бүс тогтоохтой холбоотойгоор хийсэн шинжээчийн дүгнэлт нь үндэслэл болгоход хангалтгүй, нөхөн олговор олгох асуудлыг шийдвэрлээгүй, мөн Ашигт малтмалын тухай хуулийн 14.3, 14.4-ийн зохицуулалтыг хэрэгжүүлээгүй байна. Иймд хариуцагчийн гаргасан захиргааны актууд нь нэхэмжлэгчийн хууль ёсны эрх ашиг, сонирхлыг ноцтой зөрчсөн, хууль зүйн үндэслэлгүй гэж үзжээ.