Тогтоол №2895

ХЭРГИЙН ТАНИЛЦУУЛГА: Төрийн албан хаагчийг зохион байгуулалтын өөрчлөлттэй холбогдуулан ажлаас чөлөөлсөн болон өөр хүнийг томилсон нь хууль бус гэж үзэн, анх байсан албан тушаалдаа эргүүлэн тогтоолгож, цалин хөлс, нийгмийн даатгалыг нөхөн гаргуулах шаардлага гаргасан. АНХАН ШАТ: Нэхэмжлэлийг бүхэлд нь хангаж, нэхэмжлэгчийг анх байсан албан тушаалд нь эргүүлэн тогтоолгож, ажилгүй байсан хугацааны цалин хөлс болох 7,340,060 төгрөгийг хариуцагчаас гаргуулж олгох, улсын тэмдэгтийн хураамжийг хариуцагчаас гаргуулахаар шийдвэрлэсэн.

ҮНДЭСЛЭЛ: Төрийн албан хаагчийн ажлын байрны чиг үүрэг өөрчлөгдөөгүй байхад, зохион байгуулалтын бүтэц, орон тооны өөрчлөлттэй холбогдуулан албан тушаалд нь эргүүлэн томилоогүй нь Төрийн албаны тухай хуулийн 27 дугаар зүйлийн 27.2.3-т заасныг зөрчсөн, мөн хуулийн 4 дүгээр зүйлийн 4.1, 4.2.6-д заасан зарчмуудыг зөрчсөн хууль бус эс үйлдэхүй болох нь тогтоогдсон. Хуульд заасан чиг үүрэг хэвээр хадгалагдан үлдсэн албан тушаалд албан хаагчийг үргэлжлүүлэн ажиллуулах үүргээ хариуцагч байгууллага биелүүлээгүй. Ажлын байрны тодорхойлолтод заасан чиг үүрэг өөрчлөгдөөгүй байхад, албан тушаалд үргэлжлүүлэн ажиллуулах боломж байсан хэрнээ, албан тушаал хасагдсан гэх үндэслэлгүй дүгнэлт хийж, сонгон шалгаруулалт зарлан өөр хүнийг томилсон нь үндэслэлгүй гэж үзсэн. Төрийн албан хаагчийн баталгаа, эрхийг хангаагүй, хууль ёсны ашиг сонирхлыг нь зөрчсөн. Ажилгүй байсан хугацаанд олгосон тэтгэвэр, ажилгүйдлийн тэтгэмж нь нэхэмжлэгчийн албан тушаалд буцан томилогдох хүсэл зоригоо илэрхийлээгүйн нотолгоо болохгүй.