Тогтоол №16495

ХЭРГИЙН ТАНИЛЦУУЛГА: Компанийн гүйцэтгэх удирдлагад өөрчлөлт оруулахтай холбоотой улсын бүртгэл хийхээс татгалзсан шийдвэрийг хууль бус болохыг тогтоолгож, холбогдох өөрчлөлтийг улсын бүртгэлд бүртгүүлэх тухай захиргааны хэргийн маргаан. АНХАН ШАТ: Компанийн гүйцэтгэх удирдлагад өөрчлөлт оруулах тухай өргөдлийг хүлээн авахаас татгалзсан улсын бүртгэгчийн шийдвэр хууль бус болохыг тогтоож, өөрчлөлтийг бүртгэхийг даалгасан.

ҮНДЭСЛЭЛ: Улсын бүртгэлийн байгууллага нь компанийн гүйцэтгэх удирдлагын өөрчлөлтийг бүртгэхдээ хууль тогтоомжид зааснаас бусад үндэслэлээр татгалзах, хуульд заагаагүй баримт бичгийг шаардах эрхгүй. Хуулийн этгээдийн гүйцэтгэх удирдлагыг бүртгүүлэхэд улсын бүртгэлийн гэрчилгээний бүрдүүлбэр дутуу гэх үндэслэл нь компанийн тамга, гэрчилгээг хуучин удирдлага бусдад шилжүүлэн өгөөгүй, компанийн үйл ажиллагаанд хэрэглэх боломжгүй нөхцөл байдал үүссэн тул хуульд заасан "хаяж, үрэгдүүлсэн" гэх нөхцөлтэй адилтган үзнэ. Хувьцаа эзэмшигчдийн хурлын шийдвэр, тогтоол дээр тамга дарж баталгаажуулаагүй үндэслэл нь хуульд заасан шаардлага хангаагүй бөгөөд шинээр томилогдсон гүйцэтгэх захирал гарын үсэг зурснаар шаардлагыг хангасан гэж үзнэ. Захиргааны байгууллага нь бодит нөхцөл байдлыг тогтоож, нотлох баримтыг үнэлэх үүргээ хэрэгжүүлээгүй, эрх хэмжээгээ хэтрүүлсэн нь хууль бус.