Тогтоол №1462

ХЭРГИЙН ТАНИЛЦУУЛГА: М Нам нь Архангай аймгийн Сонгуулийн хорооны тогтоолоор өөрийн 23 нэр дэвшигчийг бүртгэхээс татгалзсаныг хүчингүй болгуулж, бүртгүүлэхийг даалгах шаардлага бүхий нэхэмжлэл гаргав. Нэхэмжлэгч нь Сонгуулийн тухай хуулийн шаардлагыг хангаж, холбогдох материалыг хуулийн хугацаанд бүрдүүлж өгсөн гэж үзэж байна. Хариуцагч нь нэхэмжлэгчийн нэр дэвшигчид нь холбогдох хуулийн 157 дугаар зүйлийн 157.2.3 (нэр дэвшигчийн бичгээр өгсөн зөвшөөрөл) болон 157.2.5 (өр төлбөргүй болох тухай мэдүүлэг)-д заасан баримт бичгийг ирүүлээгүй тул тогтоол нь хуульд нийцсэн гэж тайлбарлав.

АНХАН ШАТ: Шүүхээс М Намын нэхэмжлэлийг бүхэлд нь хэрэгсэхгүй болгож шийдвэрлэв.

ҮНДЭСЛЭЛ: Сонгуулийн тухай хуулийн 157 дугаар зүйлийн 157.2.3-т заасан "нэр дэвшигч бүрийн бичгээр өгсөн зөвшөөрөл" нь Сонгуулийн Ерөнхий хорооноос баталсан маягтын дагуу аймгийн сонгуулийн хороонд хандан гаргасан зөвшөөрөл байх ёстой. М Намаас намдаа хандан гаргасан хүсэлтийг энэ заалтад хамааруулах боломжгүй. Мөн Сонгуулийн тухай хуулийн 157 дугаар зүйлийн 157.2.5-д заасан "өр төлбөргүй болох тухай нэр дэвшигчийн мэдүүлэг" нь нэр дэвшигч өөрөө маягтын дагуу гаргах мэдүүлэг байх бөгөөд татварын болон шүүхийн шийдвэр гүйцэтгэх байгууллагын лавлагаа нь үүний хавсралт баримт болно. Мөн нэр дэвшигчийн намтрыг маягтын дагуу бөглөх ёстой бөгөөд энэ шаардлагыг хангаагүй, зарим нэр дэвшигчийн баримт бичигт дутагдалтай байсан нь тогтоогдсон. Хуульд заасан нэр дэвшүүлэх хугацаа дууссанаас хойш ирүүлсэн нэмэлт материалуудыг хүлээж аваагүй нь үндэслэлтэй байв.