Тогтоол №3561

ХЭРГИЙН ТАНИЛЦУУЛГА: Шүүхийн шийдвэр гүйцэтгэх ерөнхий газар нь Хорих 421 дүгээр ангийн ахлах нягтлан бодогч Б.Н-ээс албан үүргээ гүйцэтгэх явцад байгууллагад учруулсан 25.188.031 төгрөгийн хохирлыг гаргуулахаар нэхэмжилжээ. Үүнд: хувь хүнээс худалдан авалт хийхдээ орлогын албан татвар суутгал хийгээгүй, хүнсний материал, шатахууны зарцуулалтад илүүдэл гаргасан, эрх хэмжээгээ хэтрүүлэн хүнсний материал зарцуулсан зэрэг зөрчлүүд багтсан байна. Хариуцагч нь дээрх нэхэмжлэлийг эс зөвшөөрч, шалгалтын явцад тайлбар аваагүй, зарим зарцуулалтын талаарх үндэслэл тодорхойгүй, өөрөө худалдан авалт хийх эрхгүй байсан гэж тайлбарлажээ.

АНХАН ШАТ: Иргэний хуулийн холбогдох зүйл заалтууд дээр үндэслэл тогтоогдохгүй хэмээн үзэж, нэхэмжлэлийг бүхэлд нь хэрэгсэхгүй болгож, нэхэмжлэгчээс улсын тэмдэгтийн хураамж гаргуулан Шүүхийн шинжилгээний үндэсний хүрээлэнд төлүүлэхээр шийдвэрлэсэн.

ДАВЖ ЗААЛДАХ ШАТ: Анхан шатны шүүхийн шийдвэрт өөрчлөлт оруулж, хариуцагч Б.Н-ээс ангийн хүнсний материалд илүү зарцуулсан 6.946.079 төгрөгийг гаргуулж, нэхэмжлэлийн үлдсэн хэсгийг хэрэгсэхгүй болгож, шүүхийн зардлыг талуудаас гаргуулж шийдвэрлэжээ.

ХЯНАЛТЫН ШАТ: Хариуцагчийн өмгөөлөгчөөс давж заалдах шатны шүүхийн магадлалыг эс зөвшөөрч гомдол гаргасан. Хяналтын шатны шүүхээс давж заалдах шатны шүүх Хөдөлмөрийн тухай хуулийг буруу тайлбарлан хэрэглэсэн, бусад техникийн алдаа гаргасныг тогтоож, хариуцагчийн гомдлыг хангаж, давж заалдах шатны шүүхийн магадлалыг хүчингүй болгож, анхан шатны шүүхийн шийдвэрт өөрчлөлт оруулах нь зүйтэй гэж үзсэн.

ҮНДЭСЛЭЛ: Хөдөлмөрийн тухай хуулийн 135 дугаар зүйлийн 135.4-т заасныг баримтлан, ажилтантай эд хөрөнгийн бүрэн хариуцлагын тухай гэрээ байгуулаагүй бол түүнд эд хөрөнгийн бүрэн хариуцлага хүлээлгэж болохгүй гэх хориглосон хэм хэмжээг давж заалдах шатны шүүх зөрчсөн. Анхан шатны шүүх хэргийг хуулийн дагуу шийдвэрлэсэн боловч холбогдох Хөдөлмөрийн тухай хуулийг хэрэглээгүй алдаа гаргасан. Тиймээс анхан шатны шүүхийн шийдвэрт өөрчлөлт оруулж, Хөдөлмөрийн тухай хуулийн 135 дугаар зүйлийн 135.4-т заасныг баримтлан шийдвэрлэх нь зүйтэй.