Тогтоол №28737

ХЭРГИЙН ТАНИЛЦУУЛГА: Агаарын хөлгийн шатахуун худалдах, худалдан авах болон хадгалалтын гэрээний үүрэг болон нэмэлт гэрээний үүргийн биелэлтээс үүссэн төлбөр гаргуулах шаардлагатай холбоотой нэхэмжлэл, сөрөг нэхэмжлэлийн маргаан. АНХАН ШАТ: Хариуцагч ******* ТӨХК-аас нэхэмжлэгч ******* ******* ******* ХХК-д гэрээний үүргээс 3,978,653,699.05 төгрөг гаргуулах, хариуцагчаас нэхэмжлэгчийн үндэслэлгүй хөрөнгөжсөн 187,152,500 төгрөгийг гаргуулах шийдвэрлэсэн. ДАВЖ ЗААЛДАХ ШАТ: Нэхэмжлэгч болон хариуцагч аль аль нь анхан шатны шүүхийн шийдвэрийг эс зөвшөөрч давж заалдах гомдол гаргасан. Хариуцагч нь үндэслэлгүй хөрөнгөжсөн хэмээх сөрөг нэхэмжлэлийн ихэнх хэсгийг хэрэгсэхгүй болгосныг, нэхэмжлэгч нь хариуцагчийн сөрөг нэхэмжлэлийн шаардлагаас хэсэгчилэн хангасан хэсгийг буюу нийт 187,152,500 төгрөгийг бүхэлд нь хэрэгсэхгүй болгуулах гомдол гаргасан. ҮНДЭСЛЭЛ: Давж заалдах шатны шүүхээс анхан шатны шүүх хуралдаанаар хэлэлцэгдсэн нотлох баримтуудад хангалттай дүгнэлт хийгээгүй, хуулийг буруу тайлбарлан хэрэглэсэн, нотлох баримтын шаардлага хангаагүй баримтыг шийдвэрийн үндэслэл болгосон хэмээн үзэж, анхан шатны шүүхийн шийдвэрийг хүчингүй болгож, хэргийг дахин хэлэлцүүлэхээр буцаасан. Талууд нийлүүлсэн шатахууны үнийн өөрчлөлттэй холбогдон үнэд тохируулга хийхдээ Сингапурын биржийн ханшийн албан ёсны мэдээллийг өгөх үүргээ зөрчсөн эсэх, биржийн ханшийн зөрүүтэй байдлын талаар маргасан. Анхан шатны шүүхээс хэргийн 1 хавтасны 120 дахь талд авагдсан цахим баримтад хуулийн дагуу ажиллагаа явуулаагүй, хуулбар хувийг үнэлсэн нь алдаатай болсон нь хэргийг эцэслэн шийдвэрлэхэд нөлөөлсөн.