ХЭРГИЙН ТАНИЛЦУУЛГА: Иргэн Ц.О нь нөхрөө нас барсны дараа үүссэн зээлийн өрөө төлж чадахгүйд хүрч, улмаар өмчлөлийнхөө орон сууцыг барьцаалсан байдалтай байв. Тэрээр шүүхийн шийдвэр гүйцэтгэлийн явцад томилогдсон шинжээчийн гаргасан үл хөдлөх хөрөнгийн үнэлгээг зах зээлийн ханшнаас доогуур, мөн тус компани нь үнэлгээ хийх эрхгүй гэж үзэн хүчингүй болгуулах шаардлага гаргасан. АНХАН ШАТ: Нэхэмжлэлийн шаардлагыг бүхэлд нь хэрэгсэхгүй болгож, нэхэмжлэгчээс улсын тэмдэгтийн хураамжид төлсөн хөрөнгийг улсын орлогод хэвээр үлдээсэн. ДАВЖ ЗААЛДАХ ШАТ: Нэхэмжлэгч Ц.О нь анхны шатны шүүхийн шийдвэртэй холбогдуулан давж заалдах гомдол гаргасан. Гомдолдоо шүүх хуралдаанд нотлох баримт хүлээж аваагүй, үнэлгээний компани нь үл хөдлөх хөрөнгийн үнэлгээ хийх эрхгүй, үнэлгээг зах зээлийн үнээс доогуур хийсэн гэж үндэслэжээ.
ҮНДЭСЛЭЛ: Давж заалдах шатны шүүх анхан шатны шүүх хуулийг зөв тайлбарлан хэрэглэсэн, хэрэг хянан шийдвэрлэх ажиллагааны журам зөрчөөгүй гэж үзэн анхан шатны шүүхийн шийдвэрийг хэвээр үлдээж, нэхэмжлэгчийн гомдлыг хангахгүй орхив. Шинжээч нь хувь хүнд олгосон тусгай зөвшөөрлөөр компаниа төлөөлөн үнэлгээ хийсэн нь хууль зүйн үндэслэлтэй гэж үзсэн. Нэхэмжлэгч нь үнэлгээний стандартын талаар гомдол гаргах болон нэмэлт баримт шүүхэд ирүүлээгүй байна.