Тогтоол №10615

ХЭРГИЙН ТАНИЛЦУУЛГА: Хувьцаа худалдах, худалдан авах гэрээ болон эрх шилжүүлэх гэрээнүүдийг хүчин төгөлдөр бус болохыг тогтоолгох, үр дагаврыг арилгуулах, мөн компанийн дүрэмд заасан хувьцаа эзэмших эрхээ хариуцагч нараар хүлээн зөвшөөрүүлэх нэхэмжлэлийг хариуцагч нар эс зөвшөөрч маргасан. АНХАН ШАТ: Нэхэмжлэгчийн гаргасан нэхэмжлэлийг Иргэний хуулийн 56 дугаар зүйлийн 56.1.2, 56.1.8-д заасан үндэслэлээр хүчин төгөлдөр бус болохыг тогтоолгох, үр дагаврыг арилгуулах, мөн 2009 оны 03 дугаар сарын 27-ны өдрийн А ХХК -ийн дүрэмд зааснаар тус компанийн 50 хувийн хувьцааг эзэмших эрхтэй болохоо хариуцагч нараар хүлээн зөвшөөрүүлэх шаардлагыг бүхэлд нь хэрэгсэхгүй болгосон. ДАВЖ ЗААЛДАХ ШАТ: Нэхэмжлэгч нь анхан шатны шүүхийн шийдвэрийг хуулийг буруу тайлбарлаж хэрэглэснээс өөрчилнө гэж гомдол гаргасан. Хариуцагч нар нь нэхэмжлэлийн шаардлагыг бүхэлд нь хүлээн зөвшөөрөхгүй гэж маргасан. ҮНДЭСЛЭЛ: Зохигчдын хоорондын маргааны үйл баримтыг цугларсан нотлох баримтад үндэслэн зөв дүгнэж, хэрэглэвэл зохих хуулийг зөв тайлбарлан хэрэглэсэн байх тул анхан шатны шүүхийн шийдвэр хууль ёсны бөгөөд үндэслэл бүхий болсон. Хувьцаа эзэмшигчдийн тогтолд гарын үсэг зурсан нь хувьцаа эзэмшигчийн эрх болон бодит хүсэл зоригийг үгүйсгэх үндэслэл болохгүй. Маргаан бүхий хэлцлүүдийг хийхдээ талуудын тодорхой зорилгод хүрэх талаар санал нэгдэж, тохиролцоонд хүрсэн болохоо ухамсарлаж гэрээнүүдийг байгуулсан нь хуульд нийцсэн.