Тогтоол №9847

ХЭРГИЙН ТАНИЛЦУУЛГА: Согтууруулах ундааны зүйл хэрэглэсэн үедээ тээврийн хэрэгсэл жолоодож, зам тээврийн осол гарган бусдад их хэмжээний хохирол учруулсан гэмт хэрэгт холбогдсон этгээд болон иргэний нэхэмжлэгчийн гомдлыг хянан шийдвэрлэв. АНХАН ШАТ: Авто тээврийн хэрэгслийн хөдөлгөөний аюулгүй байдал, ашиглалтын журам зөрчсөний улмаас хүний эрүүл мэндэд хөнгөн хохирол, бусдад их хэмжээний хохирол учруулсан гэм буруутайд тооцож, жолоодох эрхийг хасаж, хорих ял оногдуулан, иргэний нэхэмжлэлийн зарим хэсгийг шийдвэрлэв. ДАВЖ ЗААЛДАХ ШАТ: Иргэний нэхэмжлэгчийн итгэмжлэгдсэн төлөөлөгч болон түүний өмгөөлөгчөөс анхан шатны шүүхийн шийдвэр нь нэхэмжлэлийг хэрэгсэхгүй болгосон байдал, хууль сануулаагүй зэрэг үндэслэлээр гомдол гаргав. Шүүгдэгчийн өмгөөлөгчөөс иргэний нэхэмжлэлээсээ татгалзсан нь үндэслэлтэй бөгөөд шүүхээс хууль зөрчөөгүй хэмээн тайлбарлав. Прокурор анхан шатны шүүхийн шийдвэр үндэслэлгүй тул дахин хэлэлцүүлэхээр буцаах саналтай байв.

ҮНДЭСЛЭЛ: Анхан шатны шүүхийн шийтгэх тогтоол нь гэмт хэргийн улмаас учирсан хохирлын хэмжээг тодорхой тусгаагүй, үйл баримтыг тогтоогоогүй, гэмт хэргийн шинжид нийцээгүй, мөн Иргэний хуулийн заалтыг баримтлаагүйгээс Эрүүгийн хэрэг хянан шийдвэрлэх тухай хуулийг ноцтой зөрчсөн, Эрүүгийн хуулийг буруу хэрэглэсэн, хэрэглэвэл зохих хуулийг хэрэглээгүй гэж үзэн шийтгэх тогтоолыг бүхэлд нь хүчингүй болгож, хэргийг дахин хэлэлцүүлэхээр анхан шатны шүүхэд буцаав.