Тогтоол №9714

ХЭРГИЙН ТАНИЛЦУУЛГА: Эрүүгийн хуулийн тусгай ангийн 17.3 дугаар зүйлийн 2 дахь хэсгийн 2.2 дахь заалтаар залилах гэмт хэрэг үйлдсэн хэмээн бусдад их хэмжээний хохирол учруулсан яллагдагчийг шүүхэд шилжүүлсэн. АНХАН ШАТ: Гэмт хэрэг гарсан цаг хугацаанаас хойш маргаж буй үл хөдлөх хөрөнгө нь өөр хүний нэр дээр орон сууц захиалах гэрээ байгуулагдаж, төлбөр тооцоо барагдуулсан баримт авагдсан тул хэргийг нэг мөр, бүрэн бодитойгоор хянан шийдвэрлэх боломжгүй гэж үзэн, Эрүүгийн хэрэг хянан шийдвэрлэх тухай хуулийн 33.3 дугаар зүйлийн 1 дэх хэсгийн 1.2-т зааснаар хэргийг прокурорт буцаасан. ДАВЖ ЗААЛДАХ ШАТ: Прокурор анхан шатны шүүхийн шийдвэрт эсэргүүцэл бичиж, хэргийг прокурорт буцаасан нь хуульд заасан үндэслэлгүй, шүүх хуралдаанаар хэргийн бодит байдлыг тогтоох боломжтой байсан гэж үзсэн. Хохирогч болон түүний өмгөөлөгч нар прокурорын эсэргүүцлийг дэмжсэн. Давж заалдах шатны шүүх хэргийг бүхэлд нь хянаад, мөрдөн шалгах ажиллагаа хангалттай хийгдсэн, шүүх нотлох баримт болон тогтоогдсон үйл баримтад үнэлэлт дүгнэлт өгч хэргийг шийдвэрлэх боломжтой гэж дүгнэсэн. ҮНДЭСЛЭЛ: Гэмт хэрэг үйлдэгдсэн гэх хугацаанаас хойш маргаж буй үл хөдлөх хөрөнгө хэний нэр дээр шилжихээс үл хамааран яллагдагчийн үйлдлийн гэмт хэргийн шинжийг тогтоох нь зүйтэй. Эрүүгийн хэрэг хянан шийдвэрлэх тухай хуулийн 1.7 дугаар зүйлийн 2 дахь хэсэгт заасан хэргийн бодит байдлыг тогтоох, мөн 34.14 дүгээр зүйлийн 1 дэх хэсэгт зааснаар анхан шатны шүүх хэргийг хянан шийдвэрлэх боломжтой гэж үзэн, анхан шатны шүүхийн шүүгчийн захирамжийг хүчингүй болгож, хэргийг анхан шатны шүүхээр дахин хэлэлцүүлэхээр буцаасан.