Тогтоол №8539

ХЭРГИЙН ТАНИЛЦУУЛГА: Согтуурсан үедээ хувийн маргааны улмаас бусдын эрүүл мэндэд хөнгөн хохирол учруулсан хэргээр шүүгдэгч Б.О-д холбогдох хэргийг анхан шатны шүүх хэлэлцэн шийтгэх тогтоол гаргасан. АНХАН ШАТ: Шүүгдэгч Б.О-г Эрүүгийн хуулийн тусгай ангийн 11.6 дугаар зүйлийн 1.т заасан гэмт хэрэгт гэм буруутайд тооцож, 400 цагийн нийтэд тустай ажил хийлгэх ял оногдуулсан. Хэрвээ ялыг биелүүлээгүй бол хорих ялаар солихоор анхааруулж, цагдан хоригдсон хоноггүй, бусдад төлөх төлбөргүй, хэрэг хянан шийдвэрлэх ажиллагааны зардалгүй, хөрөнгөгүй, эд мөрийн баримтгүй болохыг дурдаад, шийтгэх тогтоол хүчин төгөлдөр болтол авсан хувийн баталгааг хэвээр үргэлжлүүлэхээр шийдвэрлэсэн. ДАВЖ ЗААЛДАХ ШАТ: Шүүгдэгчийн өмгөөлөгч шийтгэх тогтоолын тодорхойлох хэсэгт алдаа байгаа, шүүгдэгчийн мэдүүлэг болон хохирогчийн мэдүүлгийг үндэслэхэд хэргийн бодит байдалд нийцэхгүй, хүнлэг энэрэнгүй зарчмыг баримтлаагүй, оногдуулсан 400 цагийн нийтэд тустай ажил хийлгэх ял нь амьдралын нөхцөл байдалтай нь холбоотойгоор биелэгдэх боломжгүй хүндрэлтэй байгаа тул ялыг багасган 240 цаг болгож өөрчлөхийг хүссэн.

ҮНДЭСЛЭЛ: Давж заалдах шатны шүүх хэргийг бүхэлд нь хянаж, нотлох баримтуудыг шинжлэн судлахад шүүгдэгч Б.О нь анхан шатны шүүхээс тогтоосон хэргийг үйлдсэн нь нотлогдсон, хэргийг зүйлчилсэн хуулийн зүйл хэсэг зөв байна. Шүүгдэгчид оногдуулсан ял нь үйлдсэн хэрэг, гэм буруу, учруулсан хор уршиг, үйлдсэн нөхцөл байдалтай тохирсон, анхан шатны шүүх Эрүүгийн хуулийг зөв тайлбарлан хэрэглэсэн гэж үзэж, өмгөөлөгчийн гомдлыг хэрэгсэхгүй болгож, анхан шатны шүүхийн шийтгэх тогтоолыг хэвээр үлдээхээр шийдвэрлэсэн. Анхан шатны шүүхийн тогтоолд гарсан бичгийн алдааг Эрүүгийн хэрэг хянан шийдвэрлэх тухай хуулийн дагуу шийдвэрлэсэн.