Тогтоол №7581

ХЭРГИЙН ТАНИЛЦУУЛГА: Гэр бүлийн хамаарал бүхий хүнийг зодсон, эрүүл мэндэд нь хөнгөн хохирол учруулсан хэргээр яллагдагч А.С-д Эрүүгийн хуулийн тусгай ангийн 11.6 дугаар зүйлийн 1 дэх хэсэгт зааснаар яллах дүгнэлт үйлдсэн. АНХАН ШАТ: Анхан шатны шүүхээс гэм буруутай эсэхийг тогтоох ажиллагааг гэр бүлийн хүчирхийллийн хүндрүүлэх нөхцөл байдалтай эсэхэд үнэлэлт дүгнэлт өгөх шаардлагатай гэж үзэн, нэмэлт мөрдөн шалгах ажиллагаа хийлгүүлэхээр прокурорт буцаасан. ДАВЖ ЗААЛДАХ ШАТ: Прокурор нь анхан шатны шүүхийн шийдвэр нь Эрүүгийн хэрэг хянан шийдвэрлэх тухай хуулийг ноцтой зөрчсөн, хэргийн бодит байдалтай нийцээгүй гэж үзэн, хохирогчийн хүсэлт болон гэр бүлийн хүчирхийллийн нөхцөл байдлыг дутуу үнэлсэн зэрэг үндэслэлээр эсэргүүцэл бичсэн. Хохирогч нь шүүгчийн захирамжийг үндэслэлтэй гэж үзсэн.

ҮНДЭСЛЭЛ: Давж заалдах шатны шүүх хэргийг бүхэлд нь хянаад, яллагдагчийн үйлдлийг зөвхөн тохиолдлын шинжтэй нэг удаагийн үйлдэл гэж үзэж, Эрүүгийн хуулийн тусгай ангийн 11.6 дугаар зүйлийн 1 дэх хэсэгт заасан хөнгөн хохирол учруулах гэмт хэргийг Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.8 дахь заалтад заасан "гэр бүлийн хүчирхийлэл үйлдэж" гэмт хэргийг үйлдсэн гэж хүндрүүлэн зүйлчлэх нөхцөл байдал хангагдаагүй гэж дүгнэн, анхан шатны шүүхийн захирамжийг хүчингүй болгож, хэргийг дахин хэлэлцүүлэхээр анхан шатны шүүхэд буцаасан.