Тогтоол №6406

ХЭРГИЙН ТАНИЛЦУУЛГА: Хууль сахиулагч нь эрүүгийн хэрэг шалган шийдвэрлэхэд ач холбогдол бүхий нотлох баримтыг зориуд устгаж, хуурамчаар үйлдсэн хэрэгт холбогдсон. АНХАН ШАТ: Хууль сахиулагчийг Эрүүгийн хуулийн 21.1 дүгээр зүйлийн 2-т заасан нотлох баримт хуурамчаар үйлдэх, устгах гэмт хэрэг үйлдсэн гэм буруутайд тооцож, мөнгөн торгуулийн ял оногдуулсан. ДАВЖ ЗААЛДАХ ШАТ: Хууль сахиулагчийн өмгөөлөгч нь анхан шатны шүүхийн шийтгэх тогтоолыг Эрүүгийн хуулийг буруу хэрэглэсэн, нотлох баримтыг үнэлэхэд алдаа гаргасан гэх үндэслэлээр эс зөвшөөрч гомдол гаргасан. Прокурор анхан шатны шүүхийн шийтгэх тогтоол хууль зүйн үндэслэлтэй, хэргийн бүрдэл хангагдсан тул гомдлыг хэрэгсэхгүй болгох саналтай байсан.

ҮНДЭСЛЭЛ: Давж заалдах шатны шүүх анхан шатны шүүхийн шийтгэх тогтоолыг хэвээр үлдээж, шүүгдэгчийн өмгөөлөгчийн гомдлыг хэрэгсэхгүй болгосон. Гэмт хэргийн улмаар хохирогчдын мэдүүлгийг устгаж, баримтуудыг хуурамчаар бүрдүүлэн прокурорт гаргаж өгсөн нь Эрүүгийн хуулийн 21.1 дүгээр зүйлийн 2-т заасан гэмт хэргийн шинжийг хангасан. Нотлох баримт хуурамчаар үйлдэх, устгах гэмт хэрэг нь хохирол учирсан байхыг шаардахгүй, тодорхой үйлдэл хийснээр төгсөх, хэлбэрийн бүрэлдэхүүнтэй гэмт хэрэг тул хуурамч нотлох баримт гаргаж өгснөөр гэмт хэрэг төгссөн гэж үзнэ.