Тогтоол №5399

ХЭРГИЙН ТАНИЛЦУУЛГА: Б.Б, О.Б нар нь бүлэглэж хийдэд нэвтрэн бурхан, судар хулгайлсан хэрэгт холбогдсон. АНХАН ШАТ: Шүүгдэгч Б.Б, О.Б нарыг хулгайлах гэмт хэрэгт буруутайд тооцож, Эрүүгийн хуулийн тусгай ангийн 17.1 дүгээр зүйлийн 2.2.1-т зааснаар Б.Б-г 2 жил, өсвөр насны О.Б-г 2 жилийн хорих ялаар шийтгэж, хүмүүжлийн чанартай албадлагын арга хэмжээ авахаар шийдвэрлэсэн. Мөн О.Б-гийн ялыг 1 жил болгон бууруулж, хоёуланг нь ялаас чөлөөлж, зан үйлээ засах, хөдөлмөрлөх дадал олгох сургалтанд хамрагдах, тодорхой ажил хийх үүргийг хүлээлгэсэн. ДАВЖ ЗААЛДАХ ШАТ: Прокурор анхан шатны шүүхийн шийтгэх тогтоолыг Эрүүгийн хуулийг буруу хэрэглэсэн, ял завшуулсан хэмээн үзэж эсэргүүцэл бичсэн. Давж заалдах шатны шүүх анхан шатны шүүх Эрүүгийн хуулийг буруу хэрэглэсэн, тухайлбал хүнд гэмт хэрэг үйлдсэн өсвөр насны этгээдэд хүмүүжлийн чанартай албадлагын арга хэмжээ хэрэглэх үндэслэлгүй байхад хэрэглэсэн, мөн ял завшуулах байдлаар шийтгэсэн гэж дүгнэн, анхан шатны шүүхийн шийтгэх тогтоолыг хүчингүй болгож, хэргийг дахин хэлэлцүүлэхээр мөн шүүхэд буцааж шийдвэрлэсэн.

ҮНДЭСЛЭЛ: Хүнд гэмт хэрэгт холбогдсон өсвөр насны этгээдэд хүмүүжлийн чанартай албадлагын арга хэмжээ хэрэглэх боломжгүй бөгөөд Эрүүгийн хуулийн ерөнхий ангийн 6.7 дугаар зүйлийн 1.3 дахь хэсэгт заасан зохицуулалтыг буруу ойлгож хэрэглэн ял завшуулсан нь Эрүүгийн хуулийг буруу хэрэглэсэн байна.