Тогтоол №5002

ХЭРГИЙН ТАНИЛЦУУЛГА: Согтуу байдалтай үедээ хууль сахиулагчийг доромжилж, хүч хэрэглэн эсэргүүцэж, эрүүл мэндэд нь хөнгөн хохирол учруулсан хэрэг. АНХАН ШАТ: Хууль сахиулагчийг албан үүргээ биелүүлэхтэй холбогдуулан хүч хэрэглэн эсэргүүцэж, эрүүл мэндэд нь хөнгөн хохирол учруулсан гэм буруутайд тооцож, Эрүүгийн хуулийн тусгай ангийн 23.1 дүгээр зүйлийн 1 дэх хэсэгт зааснаар 1 жилийн хорих ял оногдуулж, Эрүүгийн хуулийн ерөнхий ангийн 6.7 дугаар зүйлийн 1.1 дэх хэсэгт зааснаар уг ялаас чөлөөлсөн. ДАВЖ ЗААЛДАХ ШАТ: Прокурор анхан шатны шүүхийн ял оногдуулж, дараа нь ял оногдуулаагүй байж ял оногдуулсан мэтээр шийдвэрлэснийг буруутгаж эсэргүүцэл бичсэн. Давж заалдах шатны шүүх хэргийг бүхэлд нь хянан үзээд, анхан шатны шүүхийн шийдвэр хуульд нийцсэн гэж үзсэн.

ҮНДЭСЛЭЛ: Хууль сахиулагчийг доромжилж, улмаар тээврийн хэрэгт байхад нь үснээс нь татаж, хоолойг нь боож, эрүүл мэндэд нь хөнгөн хохирол учруулсан үйл баримт тогтоогдож, үүнийг Эрүүгийн хуулийн тусгай ангийн 23.1 дүгээр зүйлийн 1 дэх хэсэгт зааснаар зүйлчилсэн нь хууль зүйн үндэслэлтэй. Анхан шатны шүүх ял оногдуулж, улмаар Эрүүгийн хуулийн ерөнхий ангийн 6.7 дугаар зүйлийн 1.1 дэх хэсэгт зааснаар чөлөөлж шийдвэрлэсэн нь хууль зүйн үндэслэлтэй.