Тогтоол №4311

ХЭРГИЙН ТАНИЛЦУУЛГА: Гэмт хэрэгт холбогдсон этгээдийг дэлгүүрт нэвтрэн хулгай хийсэн гэм буруутайд тооцож, ял оногдуулахдаа Эрүүгийн хуулийг буруу хэрэглэсэн, Эрүүгийн хэрэг хянан шийдвэрлэх тухай хуулийг ноцтой зөрчсөн гэх асуудал. АНХАН ШАТ: Гэм буруутайд тооцож, хорих ял оногдуулахгүйгээр хоёр жилийн хугацаагаар тэнсэн, эрүүгийн хэрэг хянан шийдвэрлэх тухай хуулийн заалтыг баримтлан таслан сэргийлэх арга хэмжээг хэвээр үлдээсэн. ДАВЖ ЗААЛДАХ ШАТ: Прокурор Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1-д заасан гэмт хэрэг нь хүнд гэмт хэргийн ангилалд хамаардаг, мөн Эрүүгийн хуулийн 7.1 дүгээр зүйлийн 2 дахь хэсэг хамаарахгүй байхад анхан шатны шүүх 7.1 дүгээр зүйлийн 1 дэх хэсгийг баримтлан хорих ял оногдуулахгүйгээр тэнсэж шийдвэрлэсэн нь Эрүүгийн хуулийг буруу хэрэглэсэн, улмаар Эрүүгийн хэрэг хянан шийдвэрлэх тухай хуулийг ноцтой зөрчсөн гэж үзэн анхан шатны шүүхийн шийтгэх тогтоолыг хүчингүй болгож, хэргийг дахин хэлэлцүүлэхээр буцаасан.

ҮНДЭСЛЭЛ: Эрүүгийн хуулийн тусгай ангийн 17.1 дүгээр зүйлийн 2 дахь хэсгийн 2.1-д заасан гэмт хэрэгт оногдуулах ялын доод хэмжээ хоёр жилээс дээш байгаа нь Эрүүгийн хуулийн ерөнхий ангийн 2.6 дугаар зүйлийн 1 дэх хэсэгт заасны дагуу хүнд гэмт хэрэгт тооцогдох бөгөөд энэ тохиолдолд Эрүүгийн хуулийн 7.1 дүгээр зүйлийн 2 дахь хэсэг үйлчлэх тул анхан шатны шүүхээс хэрэглэх ёсгүй Эрүүгийн хуулийн 7.1 дүгээр зүйлийн 1 дэх хэсгийг баримтлан хорих ял оногдуулахгүйгээр тэнсэж шийдвэрлэсэн нь Эрүүгийн хуулийг буруу хэрэглэсэн, эрүүгийн хэрэг хянан шийдвэрлэх тухай хуулийг ноцтой зөрчсөн гэж үзэв.