Тогтоол №4126

ХЭРГИЙН ТАНИЛЦУУЛГА: Залилан мэхлэх болон мөрдөн байцаалтаас зайлсхийсэн хэргээр яллагдагч Г.Т-рт холбогдох хэргийг анхан шатны шүүхэд хянан шийдвэрлэсэн. АНХАН ШАТ: Яллагдагчийг бусдын эд хөрөнгийг залилан мэхэлсэн гэм буруутайд тооцож, 4 жил хорих ял оногдуулж, учирсан хохирлыг барагдуулахаар шийдвэрлэсэн. ДАВЖ ЗААЛДАХ ШАТ: Ялтан болон хохирогч нар анхан шатны шүүхийн шийтгэх тогтоолд гомдол гаргасан. Ялтангийн өмгөөлөгч ял хүндрүүлэх нөхцөлийг хууль бусаар тогтоосон, хохирлыг барагдуулах талаар учир шалтгааныг бүрэн авч үзээгүй гэж маргав. Хохирогч өөрийн өмчлөлийн автомашиныг буцаан авахаар гаргасан иргэний нэхэмжлэлийг анхан шатны шүүх шийдвэрлээгүй хэмээн гомдол гаргав.

ҮНДЭСЛЭЛ: Давж заалдах шатны шүүхээс хэргийг хянан үзэхэд анхан шатны шүүх Эрүүгийн хуулийг буруу тайлбарлан хэрэглэсэн, Эрүүгийн хэрэг хянан шийдвэрлэх тухай хуулийг ноцтой зөрчсөн нь тогтоогдсон. Тодруулбал, мөрдөн байцаалтаас зайлсхийсэн үйлдлийг гэмт хэрэгт тооцохгүй болсон тул хэрэгсэхгүй болгох ёстой байсан ч шийтгэх тогтоолд тусгаагүй. Мөн зарим үйлдлүүдийг гэмт хэргийн шинжгүй гэж үзсэн боловч хэрэгсэхгүй болгосон талаар дурдаагүй. Нотлох баримтын агуулга, шүүхийн шийдвэрийн үндэслэл, ял хэмжээг тодорхойлохдоо хуулийн шаардлагыг хангаагүй. Хохирлыг нөхөн төлөөгүй байдлыг ял хүндрүүлэх нөхцөл байдал болгон авч үзсэн нь хууль зөрчсөн байв. Иймд анхан шатны шүүхийн шийтгэх тогтоолыг хүчингүй болгож, хэргийг анхан шатны шүүхээр дахин хэлэлцүүлэхээр шийдвэрлэв.