ХЭРГИЙН ТАНИЛЦУУЛГА: Д.Батсайхан, түүний хүү Б.Батцэнгэл нарыг бүлэглэн хохирогч Б.Батсайханы биед хүндэвтэр гэмтэл санаатай учруулсан гэх хэрэгт холбогджээ. Уг хэрэг 2016 оны 07 дугаар сарын 19-нөөс 20-нд шилжих шөнө хувийн таарамжгүй харьцаанаас үүссэн маргааны улмаас Булган аймгийн Засаг Даргын Тамгын газрын байранд гарсан.
АНХАН ШАТ: Орхон аймаг дахь Сум дундын эрүүгийн хэргийн анхан шатны шүүх Д.Батсайханд холбогдох Эрүүгийн хуулийн 98.2-т заасан хэргийг гэмт хэргийн бүрэлдэхүүнгүй гэсэн үндэслэлээр хэрэгсэхгүй болгожээ. Б.Батцэнгэлийн яллах дүгнэлтийг Эрүүгийн хуулийн 98.2-оос 98.1 болгон өөрчилж, түүнийг бусдын биед хүндэвтэр гэмтэл санаатай учруулсан гэм буруутайд тооцон 2 жил хорих ялыг 1 жилийн хугацаагаар тэнсэж, хянан харгалзахаар шийдвэрлэсэн.
ДАВЖ ЗААЛДАХ ШАТ: Хохирогчийн өмгөөлөгч болон дээд шатны прокурор анхан шатны шүүхийн шийдвэрийг Д.Батсайханыг үндэслэлгүй цагаатгасан, хэргийн нотлох баримтуудыг бүрэн үнэлээгүй, бүлэглэн гэмт хэрэг үйлдсэн байдал тогтоогдсон гэж үзэн тус тус давж заалдах гомдол, эсэргүүцэл гаргажээ. Орхон аймгийн Эрүүгийн хэргийн давж заалдах шатны шүүх анхан шатны шүүхийн шийтгэх тогтоолыг хэвээр үлдээж, гомдол болон эсэргүүцлийг хэрэгсэхгүй болгосон.
ҮНДЭСЛЭЛ: Шүүгдэгч Д.Батсайхан, хохирогч Б.Батсайхан нар маргалдаж ноцолдсон ч хохирогчийн биед учирсан хүндэвтэр гэмтлийг Д.Батсайханы хүү Б.Батцэнгэл учруулсан нь нотлох баримтаар тогтоогдсон. Д.Батсайхан, Б.Батцэнгэл нар бүлэглэн гэмт хэрэг үйлдсэн нь нотлогдохгүй тул анхан шатны шүүх Д.Батсайханд холбогдох хэргийг хэрэгсэхгүй болгож, Б.Батцэнгэлийн хэргийн зүйлчлэлийг өөрчилсөн нь үндэслэлтэй. Эд мөрийн баримтыг хураах, хадгалах, бэхжүүлэх журмыг зөрчсөн тул анхан шатны шүүх эдгээр баримтыг нотлох баримтаар үнэлээгүй нь хууль зөрчөөгүй. Б.Батцэнгэл нь хохирогчийн нэхэмжилсэн хохирлыг мөрдөн байцаалтын шатанд сайн дураараа төлж барагдуулсан. Иймд давж заалдах шатны шүүх анхан шатны шүүхийн тогтоолыг хэвээр үлдээж, гомдол, эсэргүүцлийг хэрэгсэхгүй болгосон.