Тогтоол №3006

ХЭРГИЙН ТАНИЛЦУУЛГА: "Зам тавьж өгсөнгүй" гэх хувийн маргаанаас үүдэн бүлэглэн зодолдож, хохирогчийн биед хамар ясны хугарал зэрэг хөнгөн гэмтэл санаатай учруулсан хэрэгт хоёр иргэн холбогджээ. Прокуророос Эрүүгийн хуулийн тусгай ангийн 99.2 дахь хэсэгт зааснаар зүйлчлэн яллах дүгнэлт үйлдэж шүүхэд шилжүүлсэн.

АНХАН ШАТ: Шүүгдэгч С.Батсанаагийн үйлдлийг Эрүүгийн хуулийн 99.2-оос 99.1 рүү өөрчилж, бусдын биед хөнгөн гэмтэл санаатай учруулсан гэм буруутайд тооцжээ. Нөгөө шүүгдэгч Д.Сүхбатад холбогдох хэргийг хэрэгсэхгүй болгож цагаатгасан. С.Батсанаад холбогдох хэргийг Эрүүгийн хуулийн 72.1.1 дэх хэсэгт зааснаар хэрэгсэхгүй болгож, эрүүгийн хариуцлагаас чөлөөлөн, хохирогчид 493.500 төгрөг олгохоор шийдвэрлэсэн.

ДАВЖ ЗААЛДАХ ШАТ: Дээд шатны прокурор анхан шатны шүүхийн хэргийг хэрэгсэхгүй болгосон хууль зүйн үндэслэлийг Эрүүгийн хуулиар бус Эрүүгийн байцаан шийтгэх хуулиар тогтоох ёстой гэж эсэргүүцэл бичсэн. Хохирогчийн өмгөөлөгч шүүгдэгчийн үйлдлийг танхайрах гэмт хэрэгт тооцох ёстой байсан, мөн мөрдөн байцаалтын шатанд зарим үйлдлийг шалгаагүй орхигдуулсан тул нэмэлт мөрдөн байцаалт хийлгэхээр гомдол гаргасан. Давж заалдах шатны шүүх хохирогчийн өмгөөлөгчийн гомдлыг хүлээн авч, анхан шатны шүүхийн шийтгэх тогтоолыг хүчингүй болгон, хэргийг нэмэлт мөрдөн байцаалт хийлгэхээр прокурорт буцаасан. Прокурорын эсэргүүцлийг хянан хэлэлцээгүй.

ҮНДЭСЛЭЛ: Анхан шатны шүүхийн шийтгэх тогтоол нь Эрүүгийн байцаан шийтгэх хуулийн 284.1-д заасан "хууль ёсны ба үндэслэлтэй байна" гэсэн шаардлагыг хангаагүй. Шүүгдэгч С.Батсанаагийн замын хөдөлгөөнд оролцох үеэрээ бусдыг шахаж, олон нийтийн нүдэн дээр хөнгөн гэмтэл учруулж зодсон үйлдэл нь танхайрах гэмт хэргийн шинжийг агуулсан байна. Мөрдөн байцаалтын болон анхан шатны шүүхийн шатанд гэмт хэргийн сэдэлт, шалтгаан, нөхцөл, оролцогчдын үйлдэл, гэм буруугийн хэлбэрийг бүрэн гүйцэд тогтоогоогүй тул Эрүүгийн хуулийг буруу хэрэглэсэн байна. Иймд хэргийн үйл баримтын талаарх дүгнэлт нь Эрүүгийн байцаан шийтгэх хуулийн 296.1-д заасан шаардлагыг хангаагүй тул хэрэгт нэмэлт мөрдөн байцаалт хийж, гэмт хэргийн зүйлчлэлийг зөв тогтоох шаардлагатай гэж үзсэн.