Тогтоол №3399

ХЭРГИЙН ТАНИЛЦУУЛГА: Шүүгдэгч нь хохирогчтой хувийн таарамжгүй харилцааны улмаас маргалдаж, өөрийг нь хутгалсныг мэдмэгц хохирогчийг хутгалж, биед нь цээжний хөндийд нэвтэрсэн шарх, цус хуралт бүхий хүнд зэргийн гэмтэл учруулсан хэрэгт Эрүүгийн хуулийн 96.1 дүгээр зүйлд зааснаар яллах дүгнэлт үйлдэж шүүхэд шилжүүлжээ.

АНХАН ШАТ: Анхан шатны шүүх нь хэргийг шалган тогтоох ажиллагаа бүрэн бус, гэмт хэрэг гарсан байдал, үйлдсэн арга зэрэг нотолбол зохих асуудлууд дутуу, хохирогч болон гэрчийн мэдүүлгүүд зөрүүтэй байх тул шүүх хуралдаанаар нөхөн гүйцэтгэх боломжгүй гэж үзэн, хэргийг нэмэлт мөрдөн байцаалтад буцаахаар шийдвэрлэсэн. Шүүгдэгчид авсан батлан даалтад өгөх таслан сэргийлэх арга хэмжээг хэвээр үргэлжлүүлэв.

ДАВЖ ЗААЛДАХ ШАТ: Улсын яллагч нь анхан шатны шүүхийн тогтоолыг хууль ёсны бөгөөд үндэслэлтэй байх шаардлагыг хангаагүй, давж заалдах шатны шүүхийн өмнөх магадлалын заалтыг зөрчсөн, хэрэгт цугларсан нотлох баримтуудад бүрэн дүгнэлт хийж чадаагүй гэж үзэн эсэргүүцэл бичсэн. Давж заалдах шатны шүүх нь улсын яллагчийн эсэргүүцлийг хүлээн авч, анхан шатны шүүхийн тогтоолыг хүчингүй болгож, хэргийг шүүх хуралдааны ажиллагаанаас эхлэн дахин хэлэлцүүлэхээр мөн шүүхэд буцааж, таслан сэргийлэх арга хэмжээг хэвээр үргэлжлүүлсэн.

ҮНДЭСЛЭЛ: Анхан шатны шүүхийн тогтоол нь хууль ёсны бөгөөд үндэслэл бүхий байх шаардлагыг хангаагүй байна. Учир нь, хэрэгт цугларсан нотлох баримтууд нь гэмт хэргийн үйл явцыг тал бүрээс нь бүрэн гүйцэт бодитой тогтооход хангалттай байсан бөгөөд хохирогч, гэрчийн мэдүүлгийн зөрүүг шүүх хуралдаанд талуудын хүсэлтээр арилгаж, хэргийг эцэслэн шийдвэрлэх боломжтой байв. Түүнчлэн, давж заалдах шатны шүүхээс өмнө нь тухайн хэргийг нэмэлт мөрдөн байцаалтад буцаах шаардлагагүй, цугларсан нотлох баримтад үндэслэн шийдвэрлэхийг даалгасан магадлалыг анхан шатны шүүх зөрчсөн. Иймд улсын яллагчийн эсэргүүцлийг хүлээн авч, анхан шатны шүүхийн тогтоолыг хүчингүй болгож, хэргийг шүүх хуралдааны ажиллагаанаас эхлэн дахин хэлэлцүүлэхээр буцаасан нь зүйтэй.