Тогтоол №3308

ХЭРГИЙН ТАНИЛЦУУЛГА: Ялтан нь согтууруулах ундаа хэрэглэсэн үедээ бусдын гэрт хохирогчийн хацар хэсэгт хутгыг зэвсгийн чанартай зүйл болгон хэрэглэж зүсч, хөнгөн гэмтэл учруулан танхайрсан. Прокурор уг үйлдлийг Эрүүгийн хуулийн 181.3-т зааснаар зүйлчилсэн. Ялтан өмнө нь энэ төрлийн гэмт хэрэгт шийтгүүлсэн байсан.

АНХАН ШАТ: Анхан шатны шүүх ялтныг танхайрах гэмт хэргийг урьд нь шийтгүүлсэн этгээд, зэвсэг хэрэглэж үйлдсэн гэм буруутайд тооцон, Эрүүгийн хуулийн 181.3-т зааснаар 6 жилийн хорих ял оногдуулж, чанга дэглэмтэй хорих ангид эдлүүлэхээр шийдвэрлэсэн.

ДАВЖ ЗААЛДАХ ШАТ: Ялтан болон түүний өмгөөлөгч нь хэргийн зүйлчлэлийг эс зөвшөөрч, үйл явдлын бодит байдал өөр, хутга бус аяга шидсэн, гэмтэл нь хөнгөн тул Эрүүгийн хуулийн 99.1-т зааснаар зүйлчлэхийг хүссэн. Дээд шатны прокурор анхан шатны шүүхийн тогтоолд шүүгдэгчийн нэрийг буруу бичсэн нь Эрүүгийн байцаан шийтгэх хуулийн 284 дүгээр зүйлийг зөрчсөн тул өөрчлөлт оруулах эсэргүүцэл бичсэн. Давж заалдах шатны шүүх анхан шатны шүүхийн шийтгэх тогтоолыг хүчингүй болгож, хэргийг шүүх хуралдааны ажиллагаанаас эхлэн дахин хянан хэлэлцүүлэхээр тухайн шүүхэд буцаасан.

ҮНДЭСЛЭЛ: Анхан шатны шүүхийн тогтоол нь Эрүүгийн байцаан шийтгэх хуулийн 284.1-т заасан хууль ёсны, үндэслэлтэй байх шаардлагыг хангаагүй. Шүүх ялтны үйлдсэн гэмт хэргийн үйл баримтыг дүгнэхдээ хутга эсвэл аяганы алинаар гэмтэл учруулсан нь тодорхойгүй, хэрэг үйлдэгдсэн нөхцөл байдлыг тодорхой бус дүгнэсэн. Иймд шүүх хуралдаанд гэрч, шинжээч, хохирогчийг оролцуулан хэргийн байдлыг тогтоож шийдвэрлэх нь хуульд нийцнэ. Мөн шүүгдэгчийн нэрийг буруу бичсэн нь Эрүүгийн байцаан шийтгэх хуулийг ноцтой зөрчсөн. Эдгээр үндэслэлээр анхан шатны тогтоолыг хүчингүй болгож, хэргийг дахин хянан хэлэлцүүлэхээр буцаасан ба ялтан болон өмгөөлөгчийн гомдлуудыг хянан хэлэлцээгүй болно.