Тогтоол №3283

ХЭРГИЙН ТАНИЛЦУУЛГА: Ялтан согтуугаар нийгмийн хэв журмыг зөрчиж, бусдыг илтэд үл хүндэтгэн, үл ялих шалтгаанаар хүч хэрэглэн, хутгаар хохирогчийн биед хөнгөн зэргийн гэмтэл учруулж танхайрсан. Прокурор уг үйлдлийг Эрүүгийн хуулийн тусгай ангийн 181.3-т зааснаар зүйлчилсэн. АНХАН ШАТ: Шүүх ялтанг танхайрах гэмт хэрэг үйлдсэн гэм буруутайд тооцож, Эрүүгийн хуулийн 181.3-т зааснаар 3 жил 5 сарын хорих ял оногдуулсан. Таслан сэргийлэх арга хэмжээг бусдын батлан даалтаас цагдан хорихоор өөрчилсөн. ДАВЖ ЗААЛДАХ ШАТ: Ялтан болон түүний өмгөөлөгч нь хорих ялыг өөр төрлийн ялаар солих, танхайрах гэмт хэрэгт хамаарахгүй тул Эрүүгийн хуулийн тусгай ангийн 99.1-т зааснаар зүйлчлэхийг хүссэн. Хохирогч ялтныг өршөөж, хорихоос өөр төрлийн ял оногдуулахыг хүссэн. Прокурор анхан шатны шүүхийн шийдвэр хууль ёсны бөгөөд үндэслэлтэй тул гомдлыг хүлээж авахгүй байх саналыг гаргасан.

ҮНДЭСЛЭЛ: Давж заалдах шатны шүүх анхан шатны шүүхийн шийтгэх тогтоол нь Эрүүгийн байцаан шийтгэх хуулийн 284.1-д заасан хууль ёсны бөгөөд үндэслэлтэй байх шаардлагыг хангаагүй гэж үзсэн. Учир нь, тухайн хэргийг хянан шийдвэрлэх шүүх бүрэлдэхүүнд томилогдоогүй шүүгч оролцсон нь Эрүүгийн байцаан шийтгэх хуулийн 320.1.1-д заасан шүүх хууль бус бүрэлдэхүүнтэйгээр тогтоол гаргасан гэх үндэслэл болсон. Иймд анхан шатны шүүхийн шийтгэх тогтоолыг хүчингүй болгож, хэргийг шүүх хуралдааны ажиллагаанаас эхлэн дахин хэлэлцүүлэхээр анхан шатны шүүхэд буцааж, ялтанд авсан цагдан хорих таслан сэргийлэх арга хэмжээг хэвээр үргэлжлүүлэхээр шийдвэрлэсэн. Энэ магадлалд хяналтын шатны журмаар гомдол гаргах эрхгүй.