Тогтоол №3238

ХЭРГИЙН ТАНИЛЦУУЛГА: Авто тээврийн үндэсний төвийн бүртгэлийн мэргэжилтнүүд Б.Дашгүнжид, М.Төмөр-Очир нар урьдчилан үгсэн тохиролцож, гаалийн татвараас зайлсхийх зорилгоор сэлбэг хэмээн оруулж ирсэн автомашинуудыг "VRS" системд бусдын эрхийг ашиглан хууль бусаар бүртгэн, улсын дугаар, гэрчилгээ олгож, үүнийхээ төлөө хээл хахууль авсан гэх хэрэгт холбогджээ. Тэдэнд Эрүүгийн хуулийн 268.2 (хээл хахууль авах) заалтаар ял тулгасан.

АНХАН ШАТ: Сүхбаатар дүүргийн Эрүүгийн хэргийн анхан шатны шүүх хэрэгт нотлогдвол зохих асуудлууд дутуу тогтоогдсон гэж үзэн хэргийг нэмэлт мөрдөн байцаалтад буцаасан. Шүүх шүүгдэгчдийн гэм буруугийн хэлбэр, сэдэлт, гэмт хэрэг үйлдэхэд нөлөөлсөн шалтгаан нөхцөл, иргэдэд учирсан хохирлыг нэг мөр тодруулах шаардлагатайг онцлов.

ДАВЖ ЗААЛДАХ ШАТ: Улсын яллагч прокурор анхан шатны шүүхийн тогтоолыг эсэргүүцэж, прокурорын шийдвэрээр хэрэгсэхгүй болгосон гэмт хэргүүдийг (компьютерийн мэдээлэл, хуурамч бичиг баримт, татвараас зайлсхийх) шүүх дахин шалгуулах нь үндэслэлгүй гэж тайлбарлав. Шүүгдэгчид болон тэдний өмгөөлөгчид анхан шатны шүүхийн шийдвэрийг дэмжиж, прокурорын эсэргүүцлийг эс зөвшөөрсөн. Давж заалдах шатны шүүх анхан шатны шүүхийн хэргийг нэмэлт мөрдөн байцаалтад буцаасан тогтоолыг ерөнхийд нь үндэслэлтэй гэж үзсэн боловч “хяналтын шатны шүүхийн тогтоолын заалт бүрэн биелэгдээгүй” гэсэн үндэслэлийг хүчингүй болгож, энэ талаарх прокурорын эсэргүүцлийг хүлээн авсан. Мөн нэмэлт мөрдөн байцаалтаар угсраа автомашинуудын техникийн стандартыг тогтоож, шаардлагатай бол бүртгэлийг хүчингүй болгон, иргэний хохирлын асуудлыг шийдвэрлэхийг даалгасан.

ҮНДЭСЛЭЛ: Давж заалдах шатны шүүх анхан шатны шүүхийн хэргийг нэмэлт мөрдөн байцаалтад буцаах нь зөв боловч прокуророос өөрийн эрх хэмжээний хүрээнд хэрэгсэхгүй болгосон зарим зүйлчлэлүүдийн талаарх дүгнэлтийг хүчингүй болгов. Нэмэлт мөрдөн байцаалтаар гар аргаар угсарсан автомашинууд нь техникийн стандартын шаардлага хангаж буй эсэхийг шинжээчээр тогтоолгож, нийцэхгүй бол улсын бүртгэлийг хүчингүй болгон, хохирогчдыг тогтоож иргэний журмаар хохирлыг шийдвэрлэх нь зүйтэй гэж дүгнэсэн.