Тогтоол №3018

ХЭРГИЙН ТАНИЛЦУУЛГА: Г.Нямсүрэн, Б.Ачгэрэл нар согтууруулах ундаа хэрэглэсэн үедээ Ц.Мөнх-Эрдэнийг үл ялих зүйлээр шалтаглан бүлэглэн зодож, тархи доргилт болон бусад хөнгөн гэмтэл учруулж, нийгмийн хэв журмыг ноцтой зөрчин танхайрсан хэрэгт холбогджээ. Прокуророос Эрүүгийн хуулийн 181.2.1, 181.2.5 дахь хэсгээр зүйлчлэн яллах дүгнэлт үйлджээ.

АНХАН ШАТ: Сонгинохайрхан дүүргийн Эрүүгийн хэргийн анхан шатны шүүх Г.Нямсүрэн, Б.Ачгэрэл нарыг бүлэглэн догшин авирлаж танхайрсан гэм буруутайд тооцож, Эрүүгийн хуулийн 181.2.1, 181.2.5 дахь хэсгээр Г.Нямсүрэнг 3 жил 6 сар, Б.Ачгэрэлийг 3 жил 1 сарын хугацаагаар жирийн дэглэмтэй хорих ангид хорих ялаар шийтгэсэн.

ДАВЖ ЗААЛДАХ ШАТ: Ялтнууд болон тэдний өмгөөлөгчид үйлдсэн хэрэгтээ гэмшсэн, хохирлыг бүрэн төлсөн, хохирогч гомдолгүй, анх удаа гэмт хэрэг үйлдсэн, оюутан болох зэрэг нөхцөл байдлыг үндэслэн оногдуулсан хорих ялыг тэнсэж, хянан харгалзах хүсэлт бүхий гомдлууд гаргасан. Нийслэлийн Эрүүгийн хэргийн давж заалдах шатны шүүх анхан шатны шүүхийн тогтоолыг өөрчилж, Г.Нямсүрэн, Б.Ачгэрэл нарт оногдуулсан хорих ялыг тус бүр 2 жилийн хугацаагаар тэнсэж, хянан харгалзахаар шийдвэрлэсэн. Мөн тэднийг нэн даруй суллаж, засрал хүмүүжилд нь хяналт тавихыг холбогдох цагдаагийн байгууллагуудад даалгасан.

ҮНДЭСЛЭЛ: Давж заалдах шатны шүүх хэргийг бүхэлд нь хянаж, ялтнуудын үйлдсэн гэмт хэрэг нь хохирогч, гэрчүүдийн мэдүүлэг, шинжээчийн дүгнэлт, камерийн бичлэгээр нотлогдсон тул анхан шатны шүүх Эрүүгийн хуулийг зөв хэрэглэж, гэм буруутайд тооцсон нь үндэслэлтэй гэж үзэв. Гэсэн хэдий ч, ялтнууд гэм буруугаа хүлээн зөвшөөрч, хохирлыг бүрэн төлсөн, анх удаа гэмт хэрэг үйлдсэн, чин санаанаасаа гэмшсэн, хохирогч хорих ялыг хөнгөрүүлэхийг хүссэн зэрэг хөнгөрүүлэх нөхцөл байдлыг харгалзан Эрүүгийн хуулийн ерөнхий ангийн 61.1 дэх хэсэгт зааснаар хорих ялыг тэнсэж, хянан харгалзах боломжтой гэж дүгнэж, анхан шатны шийтгэх тогтоолд өөрчлөлт оруулсан байна.