Тогтоол №2939

ХЭРГИЙН ТАНИЛЦУУЛГА: Согтууруулах ундаа хэрэглэсэн үедээ хувийн таарамжгүй харилцааны улмаас маргалдаж, хохирогчийн нүүрэнд цохиж, зүүн нүдний сохрол гэмтэл учруулан, бие махбодид нь хүнд гэмтэл санаатай учруулсан хэрэг. Прокурор Эрүүгийн хуулийн тусгай ангийн 96.1-д зааснаар яллах дүгнэлт үйлдсэн.

АНХАН ШАТ: Яллагдагчийг бусдын биед хүнд гэмтэл санаатай учруулсан гэм буруутайд тооцож, Эрүүгийн хуулийн тусгай ангийн 96.1-д зааснаар таван жил нэг хоног хорих ял шийтгэн, жирийн дэглэмтэй хорих ангид эдлүүлэхээр шийдвэрлэсэн. Иргэний хуулийн дагуу хохирогчид гэм хорын төлбөрт мөнгөн хөрөнгө гаргуулж олгосон.

ДАВЖ ЗААЛДАХ ШАТ: Ялтан болон түүний өмгөөлөгчөөс давж заалдах гомдол гаргасан. Ялтан тухайн үед хохирогч өөрийг нь зодож, чихэнд нь гэмтэл учруулсан болохыг шалгуулах шаардлагатайг дурдсан. Өмгөөлөгч нь мөрдөн байцаалтын шатанд яллагдагчийн биед учирсан гэмтэл, тухайлбал тархины гэмтэл болон сонсголын эрхтний гэмтлийг дутуу шалгасан, шинжээчийн дүгнэлт хуулийн шаардлага хангаагүй тул хэргийг нэмэлт мөрдөн байцаалтад буцаахыг хүссэн. Прокурор анхан шатны шийтгэх тогтоолыг хэвээр үлдээх саналтай байсан. Давж заалдах шатны шүүх анхан шатны шүүхийн шийтгэх тогтоолыг хүчингүй болгож, хэргийг нэмэлт мөрдөн байцаалтад буцаасан. Ялтанд хэрэглэсэн цагдан хорих таслан сэргийлэх арга хэмжээг хэвээр үргэлжлүүлсэн.

ҮНДЭСЛЭЛ: Анхан шатны шүүхийн шийтгэх тогтоол нь Эрүүгийн байцаан шийтгэх хуулийн шаардлагыг хангаагүй. Мөрдөн байцаалтын шатанд шалгавал зохих зарим нөхцөл байдлыг орхигдуулсан, тодруулах шаардлагатай байна. Хохирогчийн "зүүн нүдний сохрол" гэмтлийн талаарх мэдүүлэг нь Гэмтлийн зэрэг тогтоох журмын тодорхойлолттой нийцэхгүй, шинжээчийн дүгнэлт эргэлзээтэй байна. Гэмтлийн зэрэг болон хөдөлмөрийн чадвар алдалтын хувийг дахин шинжилгээ хийлгэн тогтоох шаардлагатай. Шинжээчийн дүгнэлт нь Эрүүгийн байцаан шийтгэх болон Шүүхийн шинжилгээний тухай хуулийн шаардлагыг хангаагүй. Прокурорын яллах дүгнэлтэд хуульд байхгүй үг хэллэг хэрэглэж, Эрүүгийн хуулийг буруу хэрэглэсэн байна. Ялтан, өмгөөлөгчийн гомдолд дурдсан хохирогчийн ялтанд гэмтэл учруулсан тухай асуудлыг тухайн хэрэгт хамааруулан хэлэлцээгүй боловч, холбогдох байгууллагад гомдол гаргах эрх нь нээлттэй. Давж заалдах шатны шүүх Эрүүгийн байцаан шийтгэх хуулийн холбогдох заалтуудыг үндэслэн хэргийг нэмэлт мөрдөн байцаалтад буцаав.