Тогтоол №2876

ХЭРГИЙН ТАНИЛЦУУЛГА: С.Б, Б.Б нар согтууруулах ундаа хэрэглэсэн үедээ бүлэглэн насанд хүрээгүй хохирогчийг орцонд хүч хэрэглэн, амь биед нь аюултайгаар заналхийлж, гар утас, пүүз, куртка зэрэг нийт 240,000 төгрөгийн эд зүйлсийг дээрэмдсэн хэрэгт холбогдсон. Прокурор Эрүүгийн хуулийн тусгай ангийн 147 дугаар зүйлийн 147.2-оор яллах дүгнэлт үйджээ.

АНХАН ШАТ: Шүүгдэгч С.Б, Б.Б нарыг бүлэглэн, амь биед аюултай хүч хэрэглэхээр заналхийлэн дээрэмдсэн гэмт хэрэг үйлдсэн гэм буруутайд тооцон, ЭХ-ийн 147.2-оор С.Б-д 3 жил 6 сар, Б.Б-д 3 жил 4 сар 10 хоног хорих ял тус тус оногдуулж, жирийн дэглэмтэй хорих ангид эдлүүлэхээр шийдвэрлэсэн.

ДАВЖ ЗААЛДАХ ШАТ: Ялтан нарын өмгөөлөгчид хохирогчийн эд зүйлийг авахдаа хүч хэрэглээгүй, зодож цохиогүй, айлган сүрдүүлсэн нь хэлбэрийн төдий байсан тул хэргийг дээрэмдсэн (ЭХ-147) бус булаасан (ЭХ-146) гэж өөрчлөн зүйлчилж, ялыг хөнгөрүүлэн тэнсэхийг хүссэн. Прокурор гэмт хэрэг нотлогдсон, зүйлчлэл тохирсон, анхан шатны шүүхийн шийтгэх тогтоол хууль ёсны тул хэвээр үлдээхийг хүссэн.

ҮНДЭСЛЭЛ: Давж заалдах шатны шүүх анхан шатны шүүхийн шийтгэх тогтоолыг хууль ёсны, үндэслэлтэй гэж үзэн хэвээр үлдээв. Хохирогчийн мэдүүлэг, бусад нотлох баримтаар ялтан нар эд зүйлсийг авахдаа "зодно", "ална" хэмээн заналхийлж, эсэргүүцэл үзүүлэхээс сэргийлж хацар, нуруунд нь цохиж хүч хэрэглэсэн нь тогтоогдсон. Энэ нь хохирогчийн амь биед аюултай нөхцөл байдал үүсгэсэн дээрмийн гэмт хэргийн шинжийг хангасан байна. Иймд хэргийн зүйлчлэлийг өөрчлөх, ялыг хөнгөрүүлэх хууль зүйн үндэслэлгүй гэж дүгнэж, өмгөөлөгчийн гомдлыг хэрэгсэхгүй болгосон.