Тогтоол №18202

ХЭРГИЙН ТАНИЛЦУУЛГА: Хуулийн этгээдийн бусдын олон тооны малыг хулгайлсан үйлдлийг шүүгдэгч үйлдсэн гэм буруутайд тооцон эрүүгийн хариуцлага оногдуулсан анхан шатны шүүхийн шийтгэх тогтоолыг эс зөвшөөрч, өмгөөлөгч давж заалдах гомдол гаргасан. АНХАН ШАТ: Шүүгдэгчийг бусдын 9 адууг хулгайлсан гэмт хэрэг үйлдсэнд тооцож, Эрүүгийн хуулийн тусгай ангийн 17.12 дугаар зүйлийн 2 дахь хэсгийн 2.1-д зааснаар нэг жилийн хугацаагаар хорих ял оногдуулж, хулгайлахдаа ашигласан морины үнэ болох 900,000 төгрөгийг улсын төсөвт шилжүүлж, цагдан хорих таслан сэргийлэх арга хэмжээг хэвээр үргэлжлүүлэн шийдвэрлэсэн. ДАВЖ ЗААЛДАХ ШАТ: Гомдол гаргагч өмгөөлөгч нь шүүгдэгчийн үйлдлийг Эрүүгийн хуулийн 17.12 дугаар зүйлд бус 17.5 дугаар зүйлд хамаарах алдуул мал завших гэмт хэрэг гэж үзэн зүйлчлэлийг хөнгөрүүлэхээр санал гаргасан.

ҮНДЭСЛЭЛ: Шүүгдэгч нь бусдын 9 адууг бэлчээрээс нь тууж авч, 6 адууны тамгыг өөрчлөн худалдсан нь мал хулгайлах гэмт хэргийн шинжийг хангасан тул анхан шатны шүүхийн зүйлчлэл, ял оногдуулсан байдал нь Эрүүгийн хуулийг зөв хэрэглэсэн байна. Алдуул мал завших гэмт хэргийн шинжүүд хангагдаагүй тул өмгөөлөгчийн гомдлыг хэрэгсэхгүй болгож, анхан шатны шүүхийн шийтгэх тогтоолыг хэвээр үлдээсэн.