Тогтоол №18119

ХЭРГИЙН ТАНИЛЦУУЛГА: Шүүгдэгч нь боловсролын бакалаврын дипломыг хуурамч болохыг мэдсээр байж ашигласан хэргээр яллагдаж байна. АНХАН ШАТ: Шүүгдэгчийг Эрүүгийн хуулийн тусгай ангийн 23.2 дугаар зүйлийн 1 дэх хэсэгт заасан "дипломыг хуурамч болохыг мэдсээр байж ашигласан" гэмт хэрэг үйлдсэнд тооцож, 500,000 төгрөгөөр торгох ял оногдуулж, гэмт хэргээс олсон орлого болох 104,830,147 төгрөгийг улсын төсөвт шилжүүлнэ гэж шийдвэрлэсэн. ДАВЖ ЗААЛДАХ ШАТ: Шүүгдэгч болон түүний өмгөөлөгч нь анхан шатны шүүхээс гэмт хэргийн улмаас учирсан хохирлыг тооцохдоо хуурамч дипломыг ашиглан олсон орлогыг буруу тооцсон, хэрэглэх ёсгүй хуулийг хэрэглэсэн, нотлох баримтыг бүрэн үнэлээгүй гэж гомдол гаргасан. Давж заалдах шатны шүүх анхан шатны шүүхийн хохирлын тооцооны болон хууль хэрэглээний алдааг засаж, шүүгдэгчээс 91,745,651 төгрөгийг улсын төсөвт шилжүүлэхээр шийдвэрлэж, анхан шатны шүүхийн шийтгэх тогтоолын холбогдох хэсгийг өөрчилсөн.

ҮНДЭСЛЭЛ: Давж заалдах шатны шүүх нь шүүгдэгчийн авсан цалин хөлсийг гэмт хэргийн улмаас учирсан хохирол гэж үзэхдээ, тухайн хугацаанд мөрдөгдөж байсан хөдөлмөрийн хөлсний доод хэмжээгээр тооцож үлдээж, илүү гарсан хэсгийг гэм хорын хохирол хэмээн үзэн Иргэний хуулийн холбогдох зүйл заалтыг баримтлан улсын төсөвт шилжүүлэхээр шийдвэрлэсэн. Шүүгдэгч нь хуурамч диплом ашиглан ажиллаж байсан ч хөдөлмөрлөж байсан тул хөдөлмөрийн хөлсний доод хэмжээгээр тооцсон цалин хөлсийг түүнд үлдээх нь зүйтэй гэж үзжээ.