Тогтоол №16826

ХЭРГИЙН ТАНИЛЦУУЛГА: Жолооч нь харанхуй үед, үзэгдэлт хангалтгүй нөхцөлд хурдаа тохируулаагүйгээс явган зорчигчийг мөргөж амь насыг нь хохироосон гэмт хэрэг. АНХАН ШАТ: Автотээврийн хэрэгслийн жолооч хөдөлгөөний аюулгүй байдлын тухай хуулийг зөрчсөний улмаас хүний амь нас хохироосон гэмт хэрэгт холбогдуулан, жолоодох эрхийг 3 жил хасаж, 2 жил хорих ял оногдуулсан. ДАВЖ ЗААЛДАХ ШАТ: Шүүгдэгчийн өмгөөлөгч: Тээврийн хэрэгслийн техникийн бүрэн бус байдал нь осолд нөлөөлсөн нь тогтоогдоогүй, явган зорчигчийн буруутай үйлдэл нөлөөлсөн гэж үзэн цагаатгах, ял хөнгөрүүлэх. Хохирогчийн хууль ёсны төлөөлөгч: Гэм буруугийн хэлбэрийг бүрэн тогтоохгүй, шүүгдэгч үйлдлийнхээ хор уршгийг ухамсарлаагүй, оногдуулсан ял хөнгөн, амь хохирогчийн эрхийг хөндсөн гэж үзэн ял шийтгэлийг хүндрүүлэх. ШҮҮХ ХЯНАЖ ХЭЛЭЛЦЭВ: Хэргийн бодит байдал, цугларсан нотлох баримтуудыг харьцуулан шинжилж, анхан шатны шүүхийн дүгнэлтийг үндэслэлтэй гэж үзэн, талуудын гаргасан гомдлуудыг хэрэгсэхгүй болгож, анхан шатны шүүхийн шийтгэх тогтоолыг хэвээр үлдээсэн.

ҮНДЭСЛЭЛ: Шүүгдэгч нь зам тээврийн хөдөлгөөний аюулгүй байдлын тухай хууль, холбогдох актыг зөрчсөн нь нотлох баримтаар тогтоогдсон. Гэрлийн тусгал муутай, стандартын шаардлага хангахгүй тээврийн хэрэгслийг жолоодож явсан нь хэргийн нөхцөл байдалтай нийцсэн. Явган зорчигчийн архи согтууруулах ундааны зүйл хэрэглэсэн, зам гарамгүй газраар гарсан нь нөлөөлсөн гэх гомдлыг нотлох баримтаар бүрэн тогтоож чадаагүй. Оногдуулсан ял нь гэмт хэргийн нөхцөл байдал, учирсан хор уршиг, хувийн байдалд тохирсон, эрүүгийн хариуцлагын зорилгыг хангасан. Иргэний нэхэмжлэлийн асуудлыг иргэний журмаар шийдвэрлэх эрхийг олгосон нь хуульд нийцсэн.