Тогтоол №16332

ХЭРГИЙН ТАНИЛЦУУЛГА: Гэр бүлийн хүчирхийлэл үйлдэн биед нь хөнгөн хохирол учруулсан хэргээр яллагдагчийг Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар зүйлчлэн яллах дүгнэлт үйлдсэн. АНХАН ШАТ: Гэмтэл учирсан байдал, хохирогчийн болон яллагдагчийн мэдүүлэг хоорондоо зөрүүтэй, гэрчүүдийн мэдүүлэг аваагүй, учирсан гэмтлийн шалтгаан нөхцөл, хэрхэн учруулсан талаар нэг мөр тогтоох болон гэр бүлийн хүчирхийлэл үйлдсэн эсэх талаар нэмэлт шалгалт хийх шаардлагатай гэж үзэн хэргийг прокурорт буцаасан. ДАВЖ ЗААЛДАХ ШАТ: Хохирогч, түүний өмгөөлөгч нар шүүгчийн захирамжийг эс зөвшөөрч, гэрчүүдийг шүүх хуралдаанд оролцуулан асуулт асуух боломжтой, хэргийг прокурорт буцаах шаардлагагүй гэж гомдол гаргасан. Гэвч давж заалдах шатны шүүхээс анхан шатны шүүхийн захирамжийг үндэслэлтэй гэж үзэн гомдлыг хэрэгсэхгүй болгож, анхан шатны шүүхийн шийдвэрийг хэвээр үлдээсэн.

ҮНДЭСЛЭЛ: Хэргийн бодит байдлыг бүрэн тогтоохын тулд мөрдөгч, прокурор нь нотлох баримтыг тал бүрээс нь бүрэн бодитойгоор шалгаж, яллагдагч, шүүгдэгчийг яллах, цагаатгах, ял хүндрүүлэх, хөнгөрүүлэх нөхцөл байдлыг эргэлзээгүй тогтоох үүрэгтэй. Анхан шатны шүүхээс хэргийг прокурорт буцаахдаа дурдсан нөхцөл байдлуудыг шалгах шаардлагатай гэж үзсэн нь хуульд заасан үндэслэлтэй бөгөөд хэргийн бодит байдалтай нийцнэ.