Тогтоол №16190

ХЭРГИЙН ТАНИЛЦУУЛГА: Мөрдөгч Ч.А нь хүчиндэх хэргийн хохирогчоос авсан мэдүүлэг болон хохирогчийг тогтоох тухай мөрдөгчийн тогтоолыг хуурамчаар үйлдсэн, улмаар хуурамч баримтыг прокурор, шүүхэд гаргаж өгсөн хэрэгт холбогджээ. АНХАН ШАТ: Шүүгдэгчийг Эрүүгийн хуулийн тусгай ангийн 21.1 дүгээр зүйлийн 2 дахь хэсэгт заасан "хууль сахиулагч хэрэг шалган шийдвэрлэхэд ач холбогдол бүхий нотлох баримтыг хуурамчаар үйлдсэн, нотлох баримтыг хуурамч болохыг мэдсээр байж прокурор, шүүхэд гаргаж өгсөн" гэмт хэрэгт буруутгаж, 6,000,000 төгрөгөөр торгох ял оногдуулжээ. ДАВЖ ЗААЛДАХ ШАТ: Шүүгдэгч болон түүний өмгөөлөгчид анхан шатны шүүхийн шийдвэрийг хуулийг буруу тайлбарлаж хэрэглэсэн, нотлох баримтууд хэргийн бодит байдалтай нийцээгүй, тэдгээрийг хэргийн ач холбогдолгүй гэж үзэн цагаатгах, хэргийг хэрэгсэхгүй болгуулахаар гомдол гаргасан. ҮНДЭСЛЭЛ: Давж заалдах шатны шүүх анхан шатны шүүхийн дүгнэлт хэргийн бодит байдалтай нийцсэн, шүүх Эрүүгийн хуулийг буруу хэрэглээгүй, шүүгдэгчийн үйлдсэн гэмт хэргийн шинж тодорхой болсон, шүүгдэгчийн буруутай үйлдлийн улмаас эрх ашигт бодит хохирол учирсан, улмаар шүүгдэгчийн үйлдсэн гэмт хэргийг Эрүүгийн хуулийн тусгай ангийн 21.1 дүгээр зүйлийн 2 дахь хэсэгт заасан гэмт хэргийн шинжтэй байна гэж үзэн анхан шатны шүүхийн шийтгэх тогтоолыг хэвээр үлдээж, давж заалдах гомдлыг хэрэгсэхгүй болгожээ.