Тогтоол №14842

ХЭРГИЙН ТАНИЛЦУУЛГА: Иргэн Л.******* нь хоёр удаа гэр бүлийн хүчирхийлэл үйлдэн хамтран амьдрагчийнх нь эрүүл мэндэд хөнгөн хохирол учруулсан хэрэгт холбогджээ. АНХАН ШАТ: Шүүгдэгч Л.*******-ийг гэр бүлийн хүчирхийлэл үйлдэн хүний эрүүл мэндэд хөнгөн хохирол учруулсан гэм буруутайд тооцож, 550,000 төгрөгөөр торгох ял оногдуулж, гурван сарын хугацаанд хэсэгчлэн төлүүлэхээр шийдвэрлэсэн. ДАВЖ ЗААЛДАХ ШАТ: Прокурор анхан шатны шүүхийн шийтгэх тогтоол нь Эрүүгийн хэрэг хянан шийдвэрлэх тухай хуулийг ноцтой зөрчсөн, шүүгдэгчийн үйлдсэн хоёр хэргийн нэгийг орхигдуулсан, гэм буруутайд тооцсон зүйл, хэсгээс өөр зүйл хэсгээр ял оногдуулсан гэж үзэн эсэргүүцэл бичжээ. Өмгөөлөгч хэргийг хялбаршуулсан журмаар шийдвэрлэхэд эргэлзээ төрүүлсэн шийтгэх тогтоолыг тодорхой болгохыг хүссэн.

ҮНДЭСЛЭЛ: Давж заалдах шатны шүүх анхан шатны шүүх нь шүүгдэгчийн хоёр үйлдлийн нэгийг нь орхигдуулж, мөн гэм буруутайд тооцсон зүйл, хэсгээс өөр зүйл хэсгээр ял оногдуулсан нь Эрүүгийн хэрэг хянан шийдвэрлэх тухай хуулийг ноцтой зөрчсөн гэж үзэн шийтгэх тогтоолыг хүчингүй болгож, хэргийг анхан шатны шүүхэд дахин хэлэлцүүлэхээр буцаасан.