Тогтоол №13805

ХЭРГИЙН ТАНИЛЦУУЛГА: Бүлэглэн хууль бусаар ашигт малтмал олборлож, байгаль орчинд хохирол учруулсан хэрэг. АНХАН ШАТ: Шүүгдэгч нарыг хууль бусаар ашигт малтмал олборлож, газрын хэвлийд халдсан гэм буруутайд тооцож, Эрүүгийн хуулийн тусгай ангийн 24.2 дугаар зүйлийн 1 дэх хэсэгт зааснаар ял оногдуулж, учруулсан хохирлыг гаргуулж, эд хөрөнгийг хураахаар шийдвэрлэв. ДАВЖ ЗААЛДАХ ШАТ: Гомдол гаргагчдын зүгээс мөрдөн байцаалт хангалтгүй, хууль буруу хэрэглэсэн, хэргийн бодит байдалтай нийцээгүй, хяналтын байгууллагаас гэмт хэрэг үйлдсэн бүх этгээдийг яллагдагчаар татаагүй, хууль хяналтын байгууллагын үйл ажиллагаанд ноцтой зөрчлүүд гарсан зэрэг үндэслэлүүдээр анхан шатны шүүхийн шийтгэх тогтоолыг хүчингүй болгож, хэргийг нэмэлт мөрдөн байцаалтад буцаах, эсхүл ял хөнгөлөх, гэм буруугүйд тооцох зэрэг хүсэлт гаргасан.

ҮНДЭСЛЭЛ: Анхан шатны шүүхийн шийтгэх тогтоол нь хууль ёсны болон үндэслэлтэй байх шаардлагыг хангаагүй, мөрдөн шалгах ажиллагааны явцад Эрүүгийн хэрэг хянан шийдвэрлэх тухай хуулийг ноцтой зөрчсөн, гэмт хэрэгт хамтран оролцогчдын үүрэг, оролцоог тодорхойлоогүй, хуулийн этгээдийн оролцоог шалгаагүй, эд хөрөнгийг буруу үнэлсэн, прокурор гэмт хэрэг үйлдсэн бүх этгээдийг яллагдагчаар татсан эсэхэд хяналт тавиагүй зэрэг үндэслэлээр анхан шатны шүүхийн шийтгэх тогтоолыг хүчингүй болгож, хэргийг нэмэлт мөрдөн шалгах ажиллагаа хийлгүүлэхээр прокурорын газарт буцаахаар шийдвэрлэв.