Тогтоол №12375

ХЭРГИЙН ТАНИЛЦУУЛГА: Согтууруулах ундааны зүйл хэрэглэсэн үедээ тээврийн хэрэгсэл жолоодож, замын хөдөлгөөний аюулгүй байдлын тухай хууль, дүрмийг зөрчин, хүний эрүүл мэндэд хүндэвтэр хохирол учруулсан хэрэг. АНХАН ШАТ: Эрүүгийн хуулийн тусгай ангийн 27.10 дугаар зүйлийн 2.1-д зааснаар гэм буруутайд тооцож, тээврийн хэрэгсэл жолоодох эрхийг нэг жилийн хугацаагаар хасаж, нэг жилийн хорих ял оногдуулсан боловч Эрүүгийн хуулийн ерөнхий ангийн 6.7 дугаар зүйлийн 1.1-ийг журамлан ялыг 8 сараар тэнссэн. ДАВЖ ЗААЛДАХ ШАТ: Прокурор шүүгдэгчид тэнссэн хугацааны үүрэг, хязгаарлалтын тухай заалтыг тайлбарлаагүй нь Эрүүгийн хэрэг хянан шийдвэрлэх тухай хуулийн 36.2, 39.7 дугаар зүйлийг зөрчсөн, мөн Эрүүгийн хуулийг буруу хэрэглэсэн гэж үзэн анхан шатны шүүхийн шийтгэх тогтоолд өөрчлөлт оруулахыг шаардсан.

ҮНДЭСЛЭЛ: Шүүгдэгчийн гэм буруутай үйлдлийг тогтоосон бөгөөд анхан шатны шүүхийн ял оногдуулсан байдал нь хэргийн болон шүүгдэгчийн нөхцөл байдалд тохирсон. Гэсэн хэдий ч анхан шатны шүүх нь тэнссэн хугацаанд хүлээлгэх үүрэг, хязгаарлалтын талаар Эрүүгийн хуулийн ерөнхий ангийн 7.3 дугаар зүйлийн 4 дэх хэсгийн заалтыг тайлбарлаагүй орхигдуулсан тул прокурорын эсэргүүцлийг хүлээн авч, анхан шатны шүүхийн шийтгэх тогтоолд энэ талаар нэмэлт заалт оруулахаар шийдвэрлэсэн.