Тогтоол №6674

ХЭРГИЙН ТАНИЛЦУУЛГА: Болгоомжгүйгээр замын хөдөлгөөний аюулгүй байдлын тухай хууль, түүнд нийцүүлэн гаргасан захиргааны хэм хэмжээний актыг зөрчсөнөөс хүний эрүүл мэндэд хохирол учруулсан хэргээр шүүгдэгчийг ялласан анхан шатны шүүхийн шийдвэрт давж заалдах гомдол гаргасан. АНХАН ШАТ: Шүүгдэгчийг Эрүүгийн хуулийн тусгай ангийн 27.10 дугаар зүйлийн 2 дахь хэсгийн 2.3-т зааснаар гэм буруутайд тооцож, тээврийн хэрэгсэл жолоодох эрхийг 1 жил хасч, 6 сар хорих ялаар шийтгэж, нээлттэй хорих байгууллагад эдлүүлэхээр, мөн жолоодох эрхээ хассан хугацааг хорих ял эдэлж дууссанаас тоолохоор шийдвэрлэсэн. ДАВЖ ЗААЛДАХ ШАТ: Шүүгдэгч болон түүний өмгөөлөгч нар гэм буруугаа хүлээн зөвшөөрч, хохирлоо барагдуулсан, өөрсдөө хүнд гэмтэл авсан, болгоомжгүй гэмт хэрэг үйлдсэн зэрэг нөхцөл байдлыг харгалзан үзэж, хорих ял оногдуулахгүйгээр тэнсэх, ялыг хөнгөрүүлэх, эсхүл ялаас чөлөөлөх зэргээр шийдвэрлэх боломжтой гэж үзэж гомдол гаргасан.

ҮНДЭСЛЭЛ: Шүүгдэгч болгоомжгүй гэмт хэрэг үйлдсэн, гэм буруугаа хүлээн зөвшөөрч хохирлоо барагдуулсан, учруулсан хохирол болон бусад зардлуудыг төлж байгаа, нөхөн төлөхөө илэрхийлсэн, гэмт хэрэг үйлдсэн нөхцөл байдал, түүний хувийн байдал зэргийг харгалзан үзэж, шүүгдэгчийн гаргасан давж заалдах гомдлыг хүлээн авч, анхан шатны шүүхийн шийтгэх тогтоолын хорих ялыг оногдуулахгүйгээр 2 жил тэнсэхээр өөрчилж, жолоодох эрхээ хассан хугацааг тогтоосон. Анхан шатны шүүх шүүгдэгчийн үйлдсэн болгоомжгүй гэмт хэрэгт ял оногдуулахдаа өмнө үйлдсэн санаатай гэмт хэрэгт ял эдэлж дууссан байдлыг харгалзан үзсэн нь Эрүүгийн хариуцлагын зорилгод нийцээгүй, мөн Эрүүгийн хуулийн ерөнхий ангийн 6.1 дүгээр зүйлийн 4 дэх хэсэгт харшилсан байна.