Тогтоол №12073

ХЭРГИЙН ТАНИЛЦУУЛГА: Дөрвөн шүүгдэгч нь хохирогчийг бүлэглэн тохуурхан доромжилж, бие махбод, сэтгэл санааны шаналал, зовуурь учруулж, улмаар хоолойг нь боож ухаан алдуулснаас тархинд нь хүнд хохирол учруулсан хэргээр буруутгагдсан. АНХАН ШАТ: Дөрвөн шүүгдэгчийг Эрүүгийн хуулийн тусгай ангийн 11.1 дүгээр зүйлийн 2 дахь хэсгийн 2.1, 2.2, 2.3-т заасан гэмт хэрэгт буруутган тус бүрт нь 6 жил 6 сараас 7 жил хүртэл хорих ял оногдуулсан. ДАВЖ ЗААЛДАХ ШАТ: Шүүгдэгч нар болон тэдний өмгөөлөгчид анхан шатны шүүхийн шийдвэрийг хууль бус, үндэслэлгүй гэж үзэн гомдол гаргасан. Шүүгдэгч нарын гомдлыг хэлэлцээд, үйлдлийг хөнгөрүүлэн, эрүүгийн хариуцлагыг өөрчилж, шүүгдэгч О.Н-г Эрүүгийн хуулийн тусгай ангийн 11.1 дүгээр зүйлийн 1 дэх хэсэгт зааснаар, шүүгдэгч Д.Т, Х.А, Б.Э нарыг Эрүүгийн хуулийн тусгай ангийн 11.6 дугаар зүйлийн 2 дахь хэсэгт зааснаар буруутгаж, ялыг нь өөрчлөн тогтоосон.

ҮНДЭСЛЭЛ: Давж заалдах шатны шүүхээс анхан шатны шүүхийн дүгнэлт, шийдэл нь хэргийн бодит байдалтай нийцээгүй, үндэслэл муутай байсныг тогтоожээ. Шүүгдэгч О.Н, Д.Т, Х.А, Б.Э нарын үйлдлээр хохирогчийн биед хөнгөн гэмтэл учирсан нь тогтоогдсон боловч, хохирогчийн тархинд учирсан хүнд гэмтэл нь зөвхөн шүүгдэгч О.Н-ы хоолойг боож, унагаасны улмаас учирсныг тогтоосон. Иймд шүүгдэгч О.Н-г хүний эрүүл мэндэд хүнд хохирол санаатай учруулсан, шүүгдэгч Д.Т, Х.А, Б.Э нарыг хүний эрүүл мэндэд хөнгөн хохирол санаатай учруулсан гэмт хэрэгт бүлэглэн оролцсон гэм буруутайд тооцож, ял шийтгэлийг нь өөрчилсөн. Мөн шүүгдэгч нарт оногдуулсан нийтэд тустай ажил хийлгэх ялын хугацааг цагдан хоригдсон хугацаатай тооцон, зарим хэсгийг хасч шийдвэрлэсэн.