Тогтоол №11808

ХЭРГИЙН ТАНИЛЦУУЛГА: Хувиараа хөдөлмөр эрхэлдэг Д.Г-г гэр бүлийн хамаарал бүхий хүн буюу эхнэрээ архи уусан үедээ зодож, биед нь хөнгөн хохирол санаатай учруулсан гэмт хэрэгт холбогдуулан яллах дүгнэлт үйлдсэн. АНХАН ШАТ: Д.Г-г гэр бүлийн хүчирхийлэл үйлдэж, хүний эрүүл мэндэд хөнгөн хохирол санаатай учруулсан гэм буруутайд тооцож, Эрүүгийн хуулийн 11.6 дугаар зүйлийн 2 дахь хэсэгт зааснаар 500.000 төгрөгөөр торгох ял оногдуулсан. ДАВЖ ЗААЛДАХ ШАТ: Прокурор анхан шатны шүүхийн шийтгэх тогтоол нь Эрүүгийн хэрэг хянан шийдвэрлэх тухай хуулийн журмыг зөрчсөн, тодорхойгүй, ойлгомжгүй үндэслэлтэй гэж үзэн эсэргүүцэл гаргасан. Давж заалдах шатны шүүх прокурорын эсэргүүцлийг хүлээн авч, анхан шатны шүүхийн шийдвэрийг хүчингүй болгож, хэргийг дахин хэлэлцүүлэхээр анхан шатны шүүхэд буцаасан. ҮНДЭСЛЭЛ: Анхан шатны шүүх шийтгэх тогтоолдоо гэмт хэргийн бодит байдал, хөнгөрүүлэх, хүндрүүлэх нөхцөл байдал, ялын төрөл, хэмжээний үндэслэлийг хангалттай тусгаагүй нь Эрүүгийн хэрэг хянан шийдвэрлэх тухай хуулийн 36.2, 36.7 дугаар зүйлд заасан шаардлагад нийцээгүй байсан. Иймд хуулийг ноцтой зөрчсөн гэж үзэж хэргийг дахин хэлэлцүүлэхээр шийдвэрлэв.