Тогтоол №11373

ХЭРГИЙН ТАНИЛЦУУЛГА: Тээврийн хэрэгсэл жолоодож явахдаа замын хөдөлгөөний дүрэм зөрчин, хоёр хүний эрүүл мэндэд хүнд хохирол учруулсан хэрэгт холбогдсон шүүгдэгч Б.Г-ийн өмгөөлөгч нарын гаргасан давж заалдах гомдлыг хянан хэлэлцсэн. АНХАН ШАТ: Б.Г-ийг Эрүүгийн хуулийн тусгай ангийн 27.10 дугаар зүйлийн 1, 2 дахь хэсэгт заасан гэмт хэрэг үйлдсэнд буруутгаж, тээврийн хэрэгсэл жолоодох эрхийг 1 жил хасч, 6 сар хорих ялаар шийтгэж, учруулсан зарим хохирлыг гаргуулж өгөхийг тогтоосон. ДАВЖ ЗААЛДАХ ШАТ: Өмгөөлөгч нар нь шүүгдэгч гэм буруугаа хүлээн зөвшөөрдөг, хохирлоо барагдуулж, хохирогчтой эвлэрсэн, цагаатгах, ял хөнгөрүүлэх нөхцөл байдлыг шүүх хангалттай үнэлээгүй, бусдад оногдуулсан ялтай харьцуулахад хэт хүнд ял оногдуулсан гэж үзэн хорих ялыг тэнсэхийг хүссэн. ҮНДЭСЛЭЛ: Анхан шатны шүүх нотлох баримтаар тогтоогдсон хэргийн баримтыг үндэслэн, гэмт хэргийн нөхцөл байдал, шүүгдэгчийн гэм буруу, хувийн байдлыг харгалзан хуульд заасан төрөл, хэмжээний ял оногдуулсан нь үндэслэлтэй байна. Шүүгдэгч нь хохирлоо нөхөн төлөөгүй, ялыг тэнсэх буюу хөнгөрүүлэх нөхцөл байдал хангагдаагүй тул давж заалдах гомдлыг хүлээн авахгүй, анхан шатны шүүхийн шийтгэх тогтоолыг хэвээр үлдээжээ.