Тогтоол №10038

ХЭРГИЙН ТАНИЛЦУУЛГА: Шүүгдэгч Т.П нь согтуу байхдаа бусдын 3 гэр, 2 автомашиныг шатааж, 52,000,000 төгрөгийн хохирол учруулсан гэмт хэрэгт буруутгагджээ. АНХАН ШАТ: Шүүгдэгч Т.П-г бусдын эд хөрөнгөд их хэмжээний хохирол учруулсан гэмт хэрэг үйлдсэнд тооцож, Эрүүгийн хуулийн 17.8 дугаар зүйлийн 3 дахь хэсэгт зааснаар 2 жил 6 сараар хорих ял оногдуулж, 52,000,000 төгрөгийн хохирлыг төлүүлэхээр шийтгэжээ. ДАВЖ ЗААЛДАХ ШАТ: Шүүгдэгч Т.П нь хэргийн зүйлчлэл болон оногдуулсан ял нь тохироогүй, санамсаргүй байдлаас болж үйлдсэн гэж гомдол гаргав.

ҮНДЭСЛЭЛ: Давж заалдах шатны шүүхээс анхан шатны шүүхийн шийтгэх тогтоол нь хууль заасан шаардлагыг хангаагүй, хэргийн бодит байдалтай зөрчилтэй, нотлох баримтад үндэслэлгүй гэж үзэж, шийтгэх тогтоолыг бүхэлд нь хүчингүй болгон хэргийг дахин хэлэлцүүлэхээр анхан шатны шүүхэд буцааж шийдвэрлэв. Учир нь шүүхийн шийдвэр нь удиртгал, тодорхойлох, тогтоох хэсгүүдээрээ зөрүүтэй байсан бөгөөд гэмт хэргийн зүйлчлэл, гэм буруугийн хэлбэр, хохирлын хэмжээ, шалтгаан холбоо, түүнийг барагдуулах арга зэрэгт хууль зүйн дүгнэлт хийгээгүй, нотлох баримтыг зохих ёсоор үнэлээгүй байжээ.