ХЭРГИЙН ТАНИЛЦУУЛГА: Иргэн П.Д нь Гадаад харилцааны яамны албан тушаалтантай танилтай хэмээн хохирогчийг хуурч, ногоон паспорт гаргаж өгнө гэж амлаад 5,700,000 төгрөг залилсан хэрэгт холбогдсон.
АНХАН ШАТ: Шүүгдэгч П.Д-г Эрүүгийн хуулийн тусгай ангийн 17.3 дугаар зүйлийн 1 дэх хэсэгт заасан буюу бусдыг хуурч, зохимол байдал бий болгон, бодит байдлыг нуух замаар төөрөгдөлд оруулж, эд хөрөнгийг авсан гэмт хэрэг үйлдсэнд тооцож, 500,000 төгрөгөөр торгох ял оногдуулсан. Цагдан хоригдсон 1 хоногийг торгох ялын 15,000 төгрөгтэй тэнцэх хэмжээгээр тооцож, үлдсэн 485,000 төгрөгийг 90 хоногийн дотор төлж барагдуулахаар шийдвэрлэсэн.
ҮНДЭСЛЭЛ: Хохирогчийн мэдүүлэг, шүүгдэгчийн мэдүүлэг болон хэрэгт цугларсан бичгийн нотлох баримтуудаар залилах гэмт хэрэг үйлдсэн нь тогтоогдсон. Шүүгдэгч гэм буруугаа хүлээн зөвшөрсөн, учруулсан хохирлыг барагдуулсан, хэргийг хялбаршуулсан журмаар шийдвэрлүүлэх хүсэлт гаргасныг харгалзан үзэж, прокурорын саналын хүрээнд ял оногдуулсан.