Багш мэргэжилтэй Ө нь өөрийн асран хамгаалалтад байдаг үеэл дүү болох 10 нас 7 сартай Б-г “хичээлээ дандаа буруу хийдэг, заагаад байхад ойлгодоггүй” гэх шалтгаанаар 2020 оны 09 дүгээр сараас 2023 оны 01 дүгээр сарын 16-ны өдрийг хүртэл удаа дараа чанга дуугаар загнаж чимхэх, өшиглөж унагаах зэргээр зоддог байсан болох нь тогтоогджээ. Ө-гийн үйлдэл нь:

Ө нь өөрийн асран хамгаалалтад байгаа гэр бүлийн хамаарал бүхий 10 нас 7 сартай хүүхдийг удаа дараа загнаж, чимхэх, өшиглөх зэргээр бие махбод болон сэтгэл санааны шаналал үүсгэж зодсон байна. Энэ нь гэр бүлийн хамаарал бүхий хүнийг байнга зодсон, харгис хэрцгий харьцсан, тарчлаасан шинжийг агуулж байгаа тул Эрүүгийн хуулийн 11.7 дугаар зүйлд заасан Гэр бүлийн хүчирхийлэл үйлдэх гэмт хэргийн бүрэлдэхүүнийг хангана.

Мөн асран хамгаалагч хүн хуулиар хүлээсэн үүргээ биелүүлэлгүй, өөрийн асрамжид байгаа хүүхэдтэй хэрцгий харьцаж, түүнийг зодож шийтгэж байгаа нь хүүхдийг асран хамгаалах үүргээ зөрчсөн, хүүхдийн эсрэг гэмт хэрэг буюу Эрүүгийн хуулийн 16.7 дугаар зүйлд заасан гэмт хэргийн шинжийг давхар агуулж байна.

Иймд Ө-гийн дээрх удаа дараагийн хууль бус үйлдэл нь нэгэн зэрэг хэд хэдэн гэмт хэргийн шинжийг хангаж байгаа тул Эрүүгийн хуулийн 11.7 дугаар зүйл болон 16.7 дугаар зүйлээр зүйлчлэгдэх нь зөв юм.