Хоригдол Б хорих ангиас оргож, Булган аймгийн хөдөө амьдардаг эгч А-гийн гэрт 2017 оны 05 дугаар сард очиж, хорих ангиас оргож яваагаа хэлж, хамт байсан боловч мөн оны 07 дугаар сарын 02-нд баригджээ. А-гаас хуулийн дагуу гэрчээр мэдүүлэг авахад “надад мэдэх зүйл байхгүй” гэж мэдүүлсэн боловч хэрэгт авагдсан бусад үйл баримтын хүрээнд А-д дүү Б-гийн хорих ангиас оргох гэмт хэргийг нуун далдалж, үл мэдээлсэн гэж үзэн яллагдагчаар татсан. А-гийн өмгөөлөгч гомдол гаргасан. Зөв хариултыг сонгоно уу?

Монгол Улсын Үндсэн хууль болон Эрүүгийн хэрэг хянан шийдвэрлэх тухай хуульд зааснаар хүн өөрийн болон гэр бүлийн гишүүд, эцэг эх, үр хүүхэд, төрсөн ах, эгч, дүүгийнхээ эсрэг мэдүүлэг өгөхгүй байх үндсэн эрхтэй. Энэ нь гэр бүл, ойр дотнын хүнийхээ гэмт хэргийн талаар үл мэдээлсэн, худал мэдүүлэг өгсөн гэж тэднийг гэмт хэрэгт хамаатуулан хариуцлага хүлээлгэхгүй байх баталгаа болдог.

Иймд өөрийн төрсөн дүү Б-гийн оргосон талаар мэдээлээгүй эсхүл энэ талаар мэдүүлэг өгөхөөс татгалзсан эгч А-гийн үйлдэл нь гэмт хэрэгт хамтран оролцсон буюу гэмт хэргийн хамаарагсад болох үндэслэл болохгүй. Өмгөөлөгчийн гаргасан гомдол үндэслэлтэй бөгөөд А-г гэмт хэргийн хамаарагсад биш гэж үзнэ.