“А” болон “Б” компани нь орон нутгийн нислэгийн үйлчилгээ үзүүлдэг компаниуд юм. Зах зээлийн хязгаарлагдмал байдлаас болж тус 2 компани нь өөрсдийн нислэг үйлдэх чиглэлийг нутаг дэвсгэрээр нь хуваажээ. “А” нь баруун аймгуудад, “Б” нь зүүн аймгуудад орон нутгийн нислэг үйлдэнэ. Энэ нь Өрсөлдөөний тухай хуулийг зөрчсөн үйлдэл мөн үү?

Өрсөлдөөний тухай хуулийн дагуу зах зээлд өрсөлдөж буй аж ахуй эрхлэгчид өөр хоорондоо өрсөлдөөнийг хязгаарлахад чиглэсэн гэрээ, хэлцэл байгуулах, үгсэн тохиролцохыг хориглодог.

Энэхүү зохицуулалтын хүрээнд аж ахуй эрхлэгчид бараа бүтээгдэхүүн борлуулах, үйлчилгээ үзүүлэх зах зээлээ нутаг дэвсгэрээр болон бусад байдлаар хуваарилан тохиролцох нь өрсөлдөөнийг хязгаарласан хууль бус үйлдэл болно.

Иймд "А" болон "Б" компаниуд орон нутгийн нислэгийн чиглэлээ баруун, зүүн аймгуудаар нутаг дэвсгэрийн хувьд хуваан тохиролцсон нь өрсөлдөөнийг хязгаарлахад чиглэсэн хориглосон хэлцэл тул Өрсөлдөөний тухай хуулийг зөрчсөн үйлдэл мөн.