“О” хуулийн нөхөрлөл гадаадын хуулийн фирмтэй хамтран олон улсын хуулийн фирм байгуулахаар уулзалт товлосон аж. Уулзалтад зориулж нөхөрлөлийн партнер өмгөөлөгч Б нь залуу хуульч Р-д хандан хажуу талд байрладаг итали ресторанд маргарита пицца болон кальцоне захиалахыг даалгасан. Р нь ресторан руу утасдаж “Өмгөөлөгч Б оффистоо махан холимог пицца захиалж байна” гэж хэлжээ. Энэ тохиолдолд:

Иргэний эрх зүйн ерөнхий онол, төлөөллийн харилцааны зарчмаар хүсэл зоригоо бие даан илэрхийлэгч буюу төлөөлөгч, хүсэл зоригийг зөвхөн дамжуулагч буюу элч хоёрын хооронд тодорхой ялгаа байдаг. Төлөөлөгч нь өөрийн хүсэл зоригоор хэлцлийн нөхцөлийг тодорхойлж бусдын нэрийн өмнөөс хэлцэл хийдэг бол элч нь бусдын бэлэн хүсэл зоригийн илэрхийллийг гуравдагч этгээдэд зөвхөн хүргэх, дамжуулах үүрэгтэй этгээд юм.

Энэ тохиолдолд өмгөөлөгч Б нь өөрийн хүсэл зоригийг тодорхойлон, ямар төрлийн хоол захиалахыг залуу хуульч Р-д даалгасан. Иймд Р нь өөрийн хүсэл зоригоор шинэ хэлцэл байгуулагч төлөөлөгч биш, харин Б-гийн хүсэлтийг ресторанд хүргэх үүрэгтэй элчийн хувиар оролцож байна.