Харилцаа холбоо, хэвлэл, мэдээллийн хэрэгсэл хөгжиж буйтай холбоотойгоор дайтаж буй талуудын ажиллагааг ажиглах боломжтой болсон. Тухайлбал, байлдааны техник орон сууцны хороолол дунд байршуулж эсрэг талд цохилт өгөх, өөрийгөө өнгөлөн далдлах зэргээр байлдааны ажиллагааг явуулж буй цөөнгүй мэдээлэл байна. Гэтэл ийм ажиллагаа нь олон улсын эрх зүйн хувьд гэмт хэрэг мөн үү?

Олон улсын хүмүүнлэгийн эрх зүйд дайны үед энгийн иргэд болон иргэний зориулалттай обьектыг цэргийн халдлагаас хамгаалах зарчмыг хатуу баримталдаг. Энгийн иргэд, орон сууц зэрэг иргэний дэд бүтцийг цэргийн хүчин болон байлдааны техникийг халхлах, дайны ажиллагаанаас хамгаалах "амьд бамбай" болгон ашиглахыг бүрэн хориглодог.

Зэвсэгт мөргөлдөөний явцад энгийн иргэн, иргэний обьектоор зориуд халхавч хийж цэргийн ажиллагаа явуулах нь олон улсын нийтийн эрх зүй, түүний дотор олон улсын эрүүгийн эрх зүйн нийтээр хүлээн зөвшөөрсөн хэм хэмжээний дагуу дайны гэмт хэрэгт шууд тооцогддог.

Иймд дайтаж буй талууд байлдааны техникээ орон сууцны хороолол дунд байрлуулах замаар өөрийгөө хамгаалах болон цохилт өгөх үйлдэл нь дайны хууль, зан заншлыг ноцтой зөрчсөн дайны гэмт хэрэг мөн юм.