Р нь таксинд суух гэж байсан Ц-ын өмдний халаасанд байсангар утсыг сэмээрхэн авах үед таксины жолооч С мэдэж хохирогчид мэдэгдсэн боловч Р зугтаасан үйл баримт хэргийн оролцогч нарын мэдүүлгээр тогтоогдсон байна. Р ямар гэмт хэрэг үйлдсэн бэ?

Р нь бусдын өмчлөлийн эд хөрөнгийг өөрийн эзэмшилдээ шилжүүлэн авах үйлдлийг сэмээрхэн буюу нууц аргаар хэрэгжүүлсэн байна. Ийнхүү гар утсыг өмдний халааснаас авч өөрийн захиран зарцуулах бодит боломж бүрдүүлснээр хулгайлах гэмт хэргийн бүрэлдэхүүн төгссөн гэж үзнэ.

Үйлдэл хэрэгжсэний дараа буюу гар утсыг өөртөө авсан хойно гуравдагч этгээд мэдсэн явдал нь гэмт хэргийн сэмээрхэн авсан шинж чанар болон гэмт хэрэг төгссөн байдлыг үгүйсгэхгүй. Мөн эд хөрөнгийг авч зугтахдаа хохирогч болон бусад этгээдэд хүч хэрэглэсэн, эсхүл хүч хэрэглэхээр заналхийлсэн нөхцөл байдал тогтоогдоогүй тул дээрэмдэх гэмт хэрэг болохгүй.

Иймд Р-ийн үйлдэл нь Эрүүгийн хуульд заасан бусдын эд хөрөнгийг хүч хэрэглэхгүйгээр, нууцаар, хууль бусаар авсан хулгайлах гэмт хэргийн төгссөн бүрэлдэхүүнийг бүрэн хангаж байна.