Д нь “Б” дэлгүүрээс 1.5 сая төгрөгөөр ухаалаг зурагт худалдан авчээ. Гэтэл 1 сарын дараагаас зурагтын дэлгэц дээр жижиг цэгүүд үүсжээ. Ингээд Д нь “Б” дэлгүүрт очиж үзүүлтэл дэлгүүрийн засварын инженер үзээд үйлдвэрийн гэмтлээс үүдэлтэй гэмтэл байна гэж оношилжээ. “Б” дэлгүүр Д-ийн зурагтын дэлгэцийг засаж өгөх санал тавьжээ. Д- ийн хувьд ижил төрлийн зурагт тэдний дэлгүүрт олон байгаа тул өөр шинээр сольж өгнө үү хэмээв. Д-ийн шаардлага үндэслэлтэй юу?

Худалдан авагч Д-ийн гаргасан шаардлага үндэслэлтэй байна. Худалдагдсан зурагт нь өөрийн гэсэн цор ганц онцлоггүй, олноор үйлдвэрлэгдсэн төрлийн шинжээр тодорхойлогдох эд хөрөнгөд хамаарна.

Худалдан авагчийн буруу биш, харин үйлдвэрийн гэмтэл бүхий доголдолтой эд хөрөнгө шилжүүлсэн тохиолдолд худалдан авагч нь уг доголдлыг арилгуулахаас гадна ижил төрлийн өөр эд хөрөнгөөр солиулах шаардлага тавих эрхтэй байдаг. Дэлгүүрт ижил төрлийн зурагт бэлэн байгаа тул худалдагч нь тухайн доголдолтой эд хөрөнгийг шинээр сольж өгөх үүрэг хүлээнэ.