“Д” барилгын компани 16 давхар барилга барих хүсэлтийг Нийслэлийн Газар барилгажилтын зөвлөлд гаргасан байна. Улмаар 50 м радиуст оршин суугчдын саналыг сонсох тухай журамд заасан. Гэтэл санал гаргах эрх бүхий иргэн А нь Монгол Улсад байнга оршин суудаггүй, гэр нь эзгүй байх бөгөөд захиргааны шийдвэр гаргах ажиллагаанд төлөөлөн оролцох этгээдийг нэрлээгүй байна. Энэ тохиолдолд иргэн А-ийн эрх, хууль ёсны ашиг сонирхлыг хэн төлөөлөх вэ?

Захиргааны шийдвэр гаргах ажиллагаанд оролцогч нь эрх зүйн бүрэн чадамжгүй, эсхүл тухайн ажиллагаанд биечлэн болон өөрийн төлөөлөгчөөр дамжуулан оролцох боломжгүй бөгөөд хууль ёсны төлөөлөгчөө нэрлээгүй тохиолдолд түүний эрх, хууль ёсны ашиг сонирхлыг хамгаалах шаардлага үүсдэг.

Ийм нөхцөлд захиргааны шийдвэр гаргах ажиллагааг хэвийн явуулах болон тухайн этгээдийн ашиг сонирхлыг орхигдуулахгүй байх үүднээс холбогдох захиргааны байгууллагын оршин байгаа нутаг дэвсгэрийн Засаг даргаас төлөөлөгчийг томилон оролцуулдаг нийтлэг зохицуулалт үйлчилнэ.